Qarqaraly ulttyq parki men Naýyrzym qoryǵyna órtke qarsy tehnıka tabystaldy
ASTANA. KAZINFORM – Memleket basshysynyń tapsyrmasyna sáıkes, 2023 jyldan bastap órtke qarsy jabdyqtardy jańǵyrtý baǵdarlamasy iske asyrylyp jatyr. Baǵdarlamanyń maqsaty – orman jáne tabıǵatty qorǵaý mekemeleriniń materıaldyq-tehnıkalyq bazasyn tolyq jańartý, sondaı-aq órt qaýipsizdigin kúsheıtý.
2025 jyly lızıngtik qarjylandyrý esebinen otandyq óndiristegi órt sóndirý tehnıkasyn jetkizý josparlanǵan: 354 órt sóndirý kóligi, 349 kishi orman patrýldik órt kesheni (KOPK), jáne 322 traktor.
Ekologııa jáne tabıǵaı resýrstar mınıstrliginiń málimetinshe, jyl basynan beri 136 KOPK jáne 60 traktor jetkizilgen.
Qarqaraly ulttyq parkine órtke qarsy tehnıkany tapsyrý rásimine QR Ekologııa jáne tabıǵı resýrstar vıtse-mınıstri Nurken Sharbıev qatysty.
– Órtke qarsy tehnıkany jańartý – ormandarymyz ben tabıǵı baılyqtarymyzdy senimdi qorǵaýdyń berik negizi bolaryna senimdimin, - dedi vıtse-mınıstr.
2025 jylǵy 6 qyrkúıekte 8 birlik tehnıka Qarqaraly memlekettik ulttyq tabıǵı parkine, taǵy 8 tehnıka Naýyrzym memlekettik tabıǵı qoryǵyna teńgerimine berildi. Qalǵan erekshe qorǵalatyn tabıǵı aýmaqtar jyl sońyna deıin kezeń-kezeńimen qajetti tehnıkamen qamtamasyz etiledi.
Jańa órtke qarsy tehnıka orman órtin sóndirýge tikeleı qatysatyn orman sharýashylyǵy mamandarynyń usynystary eskerile otyryp ázirlendi. Bul tehnıka 3 tonnaǵa deıin sý tasymaldaı alady, jol talǵamaıtyn, ózin-ózi sóndirý júıesimen jáne qozǵalys barysynda sóndirý múmkindigimen jabdyqtalǵan.
Buǵan deıin «Qazsýshardyń» tehnıka parki 31%-ǵa jańartylǵanyn jazǵan edik.