Qarqaraly men Balqashqa aparatyn joldar jańaryp jatyr - QazAvtoJol
ASTANA. KAZINFORM — Qaraǵandy oblysynda respýblıkalyq mańyzy bar avtojoldar jóndelip, jol boıyndaǵy servıstik nysandar jańartylýda. Bul týraly QazAvtoJol habarlady.
Oblys aýmaǵyndaǵy respýblıkalyq mańyzy bar avtojoldardyń jalpy uzyndyǵy — 1843,5 shaqyrym. 2025 jyly 10 ýchaskede ortasha jóndeý jumystary júrgizilýde, olardyń jalpy uzyndyǵy — 291 shaqyrym. Bul jumystar týrıster jıi tańdaıtyn Qarqaraly, Balqash kóli jáne Baıanaýyl baǵyttaryn qamtıdy.
- Qarqaraly kýrorttyq aımaǵyna deıin respýblıkalyq mańyzy bar KAZ15 «Qaraǵandy – Aıagóz – Tarbaǵataı – Boǵaz» avtojoly ótedi. Qaraǵandy men Qarqaraly arasyndaǵy araqashyqtyq — 200 shaqyrym. Qazirgi tańda osy joldyń 17–102 shaqyrym aralyǵyndaǵy bóligi jóndelip jatyr. Jalpy uzyndyǵy — 85 shaqyrym. Qalǵan 115 shaqyrym jol 2021–2024 jyldar aralyǵynda jańartylǵan bolatyn.
Bul baǵytta 10 jol boıy servıstik nysan (6 kafe, 4 janarmaı quıý stantsııasy), 3 demalys alańy, 3 sýyq dárethana jáne 1 sanıtarlyq-gıgıenalyq torap jumys isteıdi. Bıyl qosymsha bir sanıtarlyq-gıgıenalyq torap pen saýda alańy ornatylady. Elektrmen jabdyqtaý, jaryqtandyrý jáne septık júıesi de qarastyrylǵan. Barlyq nysandar ulttyq standarttarǵa saı jáne jyly dárethanalarmen jabdyqtalǵan, - dep jazdy jaýapty mekemeden.
Balqash kóli men Balqash jáne Prıozersk qalalaryna jetý úshin KAZ01 «Astana – Qaraǵandy (aınalma jol) – Almaty» avtojoly paıdalanylady. Qaraǵandy – Balqash – Saryshaǵan baǵyty boıynsha búginde 68 jol boıy servıstik nysan (28 kafe, 22 JQS, 16 qonaq úı men kempıng, 2 tehnıkalyq qyzmet kórsetý stantsııasy), 3 demalys alańy jáne 4 sanıtarlyq-gıgıenalyq torap jumys istep tur.
2025 jyly bul baǵytta qosymsha 2 servıstik nysan, 21 jańa demalys alańy jáne 6 sanıtarlyq-gıgıenalyq torap salý kózdelgen. Bul nysandar Qaraǵandy – Balqash – Býrylbaıtal avtojolyn qaıta jańartý jobasy aıasynda iske asyrylady. Joba avtokólikpen saıahattaıtyn azamattardyń qaýipsizdigi men jaılylyǵyn arttyrýǵa baǵyttalǵan.
- Pavlodar oblysyndaǵy Baıanaýyl kýrorttyq aımaǵyna jetý úshin respýblıkalyq mańyzy bar KAZ20 «Qalqaman – Baıanaýyl – Úmitker – Botaqara» avtojoly qoldanylady. Bul joldyń Qaraǵandy oblysy aýmaǵyndaǵy 231–324 shaqyrym aralyǵynda 2022–2023 jyldary 58,4 shaqyrym jolǵa ortasha jóndeý júrgizildi. Qalǵan 34,6 shaqyrymǵa jobalyq-smetalyq qujattama ázirlenip jatyr.
Atalǵan jol boıynda 1 servıstik nysan, 2 demalys alańy jáne 261-shaqyrymda sanıtarlyq-gıgıenalyq toraby bar etnoaıaldama ornalasqan. Barlyq nysandar jyly dárethanalarmen jabdyqtalǵan jáne sanıtarlyq-tehnıkalyq qaýipsizdik talaptaryna saı keledi, - delingen aqparatta.
Derekke qaraǵanda, týrıstik nysandarǵa aparatyn joldardyń qoljetimdiligin arttyrý boıynsha jumystar Qazaqstannyń segiz óńirinde júrgizilip jatyr. 2025 jyly respýblıkalyq mańyzy bar 544,7 shaqyrym avtojoldy jóndeý josparlanǵan. Qaraǵandy oblysy jobalardyń aýqymy men kólemi boıynsha aldyńǵy qatarda tur.
Joldardy jóndeý jáne ınfraqurylymdy damytý — óńirdiń týrıstik tartymdylyǵyn arttyrý strategııasynyń mańyzdy bóligi. Yńǵaıly joldar, zamanaýı demalys aımaqtary men sapaly servıs turǵyndar men qonaqtarǵa jaıly ári qaýipsiz saıahattaýǵa múmkindik beredi.
Aıta keteıik, Almatynyń basty kósheleriniń birinde jańa velojol salynady.