Qarqara jaılaýynda 35 myń qonaq qatysatyn «Qymyzmuryndyq» merekesi bastaldy

Almaty oblysy ákimdigi baspasóz qyzmetiniń málimetinshe, bıyl besinshi ret uıymdastyrylyp otyrǵan mereke abyz baba Álmerek Janshyqulynyń 368 jyldyǵyna oraılastyrylǵan. Festıvalge Qazaqstannyń barlyq óńirlerinen, sondaı-aq Túrkııa, Ázerbaıjan, Qyrǵyzstan, Qytaı, Túrikmenstan, Ózbekstan jáne Qaraqalpaqstan Respýblıkasynan qonaqtar keldi. Uıymdastyrýshylardyń boljamynsha, sharaǵa barlyǵy 35 myńǵa jýyq adam qatysady.

- Tańerteńnen bastap Qarqara jaılaýyna jınalǵan jurtshylyq taqyryptyq alańdardy aralap, júzden astam kıiz úıden quralǵan etnoaýylmen tanysty. Munda qazaq halqynyń mádenı murasyn tanytatyn kórmeler uıymdastyrylyp, qolóner sheberleriniń týyndylary, sýretshilerdiń eńbekteri, aýyl sharýashylyǵy tehnıkasy men jergilikti óndirýshilerdiń ónimderi kópshilik nazaryna usynyldy, - delingen aqparatta.

Sondaı-aq qolónerge qyzyǵýshylarǵa sheberlik sabaqtary ótkizilip, ulttyq salt-dástúr men ádet-ǵurypty beıneleıtin tarıhı jádigerler kórmesi uıymdastyryldy.

Festıval aıasynda ulttyq sport túrlerinen de jarystar ótip jatyr. Qatysýshylar at báıgesi, qazaq kúresi, alyptar saıysy, teńge ilý, asyq atý jáne qoı kóterý boıynsha baq synaýda.

Mereke baǵdarlamasynda «Topjarǵan» etno-óner ortalyǵynyń shoýy, «Tolaǵaı» óner ortalyǵynyń qoıylymdary, oblys ónerpazdary men tanymal estrada juldyzdarynyń kontserti de bar.

Balalarǵa arnalǵan arnaıy aımaqta attraktsıondar, qýyrshaq teatry, qolóner jáne sýret salý sheberlik sabaqtary, sondaı-aq shahmat pen toǵyzqumalaq jarystary uıymdastyrylǵan.

Festıval qonaqtary ulttyq sýsyn qymyzdan dám tatyp, qazaqtyń dástúrli taǵamdarynan aýyz tıip jatyr.

Aıta keteıik, buǵan deıin elordalyq zeınetkerler qymyzmuryndyq merekesin atap ótken bolatyn.