Qaryzsyz ómir: Qazaqstandyqtarǵa konsýltatsııa beretin keńseler ashylýda
Elimizdiń barlyq óńirinde nesıe men qarjy máseleleri boıynsha halyqpen tikeleı jumys isteıtin Jobalyq keńseler qurylyp jatyr. Mektep oqýshylary men stýdentterge qarjy saýattylyǵy boıynsha kýrstar ázirlenýde. Bul týraly Premer-Mınıstrdiń orynbasary – Qarjy mınıstri Erulan Jamaýbaev aıtty, dep habarlaıdy Kazinform.
E. Jamaýbaev Prezıdenttiń Qazaqstan halqyna Joldaýynda halyqtyń shamadan tys qaryz alý máselesine erekshe kóńil bólgenin, Úkimetke «Qaryzsyz qoǵam» jobasyn búkil elimizge aýqymdy etýdi tapsyrǵanyn eske saldy. Bul rette Úkimet múddeli memlekettik organdarmen birlesip qajetti jumys júrgizýde.
«Atap aıtqanda, arnaıy Jol kartasy ázirlenip, bekitildi. Ol 6 negizgi baǵyt boıynsha 25 is-sharany qamtıdy. Sondaı-aq birigip is-qımyl jasaý úshin memlekettik organdar men «Amanat» partııasy arasynda Yntymaqtastyq týraly memorandým jasaldy. Jol kartasynyń árbir baǵyty boıynsha jumysty úılestirý úshin ákimdikterde jaýapty laýazymdy tulǵalar bekitildi. Respýblıkalyq mańyzy bar 3 qalada jáne elimizdiń 17 óńirinde halyqpen tikeleı jumys isteıtin óńirlik Jobalyq keńseler qurylyp jatyr», – dedi parlamenttik tyńdaýda.
Jobalyq keńselerdiń negizgi mindeti – kredıtter boıynsha merzimi ótken bereshekti retteý, qarjy alaıaqtarynan qorǵaý, azamattardyń bankrottyq máselelerin sheshýge, jumysqa ornalastyrýǵa járdemdesý jáne bıznesti qoldaý sharalaryn uıymdastyrý.
Ákimdikter jobalyq ofısterdiń jumysy úshin qajetti ǵımarattar men materıaldyq-tehnıkalyq bazalardy bóledi.
«Jobanyń taǵy bir mańyzdy baǵyty – azamattardyń, oqýshylar men stýdentterdiń qarjy saýattylyǵyn arttyrý. Búgingi tańda joǵary oqý oryndarynyń stýdentteri úshin qarjy saýattylyǵy kýrstaryn engizý pysyqtalyp jatyr. Oqýshylar úshin arnaıy kýrs ázirlenýde. Ol úshin ádistemeler men oqý quraldary daıyndalady. Nátıjesinde osy baǵyt sheńberinde 550 myń oqýshy men stýdentti oqytý josparlanǵan», – dedi Qarjy mınıstri.
Sonymen birge Aýyl sharýashylyǵy mınıstrligi men ákimdikter «Aýyl amanaty» baǵdarlamasy sheńberinde nesıe alý úshin turaqty negizde keńester berip otyrady.