«Qaryzsyz qoǵam» myńdaǵan otbasynyń daǵdarystan shyǵýyna kómektesti
ASTANA. KAZINFORM – «AMANAT» partııasynda «Qaryzsyz qoǵam» jobasyn júzege asyrý barysy qorytyndylandy.
Úsh jyl buryn partııa halyqtyń qarjylyq saýatyn arttyrý jáne azamattardyń nesıe júktemesin azaıtý baǵytynda júıeli jumys júrgizý maqsatynda barlyq jaýapty memlekettik organdardyń, bankterdiń jáne ózge de qarjy uıymdarynyń resýrsyn bir arnaǵa toǵystyrdy. Joba tutas el aýmaǵynda júzege asyryldy. Bıyl 860 myńǵa jýyq el azamaty oqýdan ótip, olarǵa kásibı kómek kórsetildi.
Sóz basynda Májilis Spıkeri, «AMANAT» partııasynyń Tóraǵasy Erlan Qoshanov «Qaryzsyz qoǵam» jobasynyń júıeli júzege asýyna aıanbaı atsalysqan barsha azamatqa alǵysyn bildirip, onyń turǵyndarǵa áleýmettik qoldaý kórsetýdiń tıimdi quralyna aınalǵanyn atap ótti.
«Búginde «AMANAT» partııasynyń «Qaryzsyz qoǵam» jobasy qandaı damý jolynan ótkenin kórip otyrmyz. Ol shaǵyn ǵana partııalyq bastamadan aýqymdy memlekettik baǵdarlamaǵa aınaldy. Prezıdenttiń, halyqtyń qoldaýyna ıe boldy. Bul joba – túrli jaǵdaıǵa tap bolǵan adamdarǵa kórsetilgen naqty kómek. Óıtkeni, sheshimin tapqan ár máseleniń artynda myńdaǵan adamnyń taǵdyry tur. Eń bastysy, azamattardyń úmiti oıanyp, senimi nyǵaıýda. Joba sonysymen qundy», – dedi Erlan Qoshanov.
Partııa Tóraǵasy búginde «Qaryzsyz qoǵam» jobasy aýqymdy pikirlester tobyn biriktirip, bul qadam azamattarǵa keshendi kómek kórsetýdiń tutas ekojúıesin qurýǵa múmkindik bergenin atap ótti. Sondaı-aq olar onlaın rejımde de jumys isteıdi. Partııa bazasynda respýblıkalyq koll-ortalyq iske qosylyp, onda kún saıyn 180 zańger 5 myńǵa jýyq ótinish qabyldaýda. Buǵan qosa, qogamfin.kz tsıfrlyq platformasy qurylyp, WhatsApp jáne Telegram-da AI-bottar jumys isteýde. Bıyldan bastap aýyldyq jerlerde shalǵaı eldi mekenderdegi azamattarmen tikeleı kezdesý ótkizetin mobıldi toptar jumys isteı bastady.
Joba qyzmetkerleri azamattarǵa alǵashqy ótinish bergen sátten bastap, olar qıyn jaǵdaıdan tolyq shyqqanǵa deıin qoldaý kórsetedi. Olar zańgerlik keńes beredi, psıhologııalyq kómek kórsetedi. Sondaı-aq shottar men múlikterdi buǵattan shyǵarýǵa, qaryzdardy qaıta qurylymdaýǵa, bereshek boıynsha tólem jasaýdyń qolaıly kestesin qurýǵa, jańa daǵdylardy úıretýge kómektesedi. Bul sharalar myńdaǵan qazaqstandyq otbasynyń daǵdarystan shyǵyp, ómirdi qaıta bastaýyna múmkindik berdi.
«Qaryzsyz qoǵam» jobasy belsendi damyp keledi. Bıyl ıAndeks, Naımı.kz jáne ózge de tsıfrlyq platformalarmen seriktestik ornatyldy. Taksı júrgizýshileriniń, jetkizý qyzmeti mamandarynyń quqyǵy men múddesin qorǵaý boıynsha keshendi jumys júrgizilýde. Búginde jobaǵa platforma arqyly jumyspen qamtylyp, shottary buǵattalǵan jáne ózge de kúrdeli máselelerge tap bolǵan 95 myńǵa jýyq azamat júgindi.
Jobaǵa elimizdiń jetekshi joǵary oqý oryndarynyń zań klınıkalary qosyldy. Joǵary kýrs stýdentteri oqytýshylardyń jetekshiligimen azamattarǵa keńes berip, qujattar ázirleýge kómektesedi jáne kúrdeli jaǵdaılardy taldaıdy. Keıbir óńirlerde «Qaryzsyz qoǵam» jobasy aıasynda qarjylyq saýattylyq kýrsynan ótken azamattar jumysqa ornalastyrylýda.
Sondaı-aq Erlan Qoshanov Májilistegi «AMANAT» partııasy fraktsııasynyń depýtattary boryshtyq máseleler týyndamaı turyp, ony aldyn alý baǵytynda júıeli quqyqtyq sharalar qabyldap jatqanyn atap ótti. Osylaısha Prezıdent tapsyrmasyna sáıkes, qarjylyq qyzmetterdi tutynýshylar quqyǵynyń qorǵalýyn kúsheıtetin birqatar zań qabyldandy. Olardyń qatarynda – bereshekti óteý merzimi 90 kúnnen asyp ketken azamattarǵa jańa tutynýshylyq nesıe berýge tyıym salý, bankten qaryz alý úshin jubaıynyń nemese zaıybynyń kelisimin alý talaby, nesıeden bas tartýǵa múmkindik beretin 24 saǵattyq «sýytý merzimi» jáne ózge de normalar bar.
Jýyrda Májilis bankter jáne bank qyzmeti týraly jańa zań qabyldady. Oǵan sáıkes, bankter azamattardyń bir mezgilde birneshe nesıe rásimdeý múmkindigin shektep, onyń sharttaryn tolyq túsindirýge tıis. Sonymen qatar problemalyq bereshekterdi sottan tys retteý quraldaryn keńeıtý jumysy jalǵasýda jáne qaryzdy kollektorlarǵa satýǵa tyıym salatyn moratorıı merzimi uzartyldy.
Іs-shara barysynda Premer-Mınıstrdiń orynbasary – Ulttyq ekonomıka mınıstri Serik Jumanǵarın «Qaryzsyz qoǵam» jobasy Úkimet pen «AMANAT» partııasynyń birlesken josparly jumysynyń nátıjesi ekenin atap ótti. Búginde ol azamattarǵa qarjylyq saýattylyqty arttyrýdan bastap, bereshekti tájirıbe júzinde retteýge deıingi keshendi qoldaý kórsetedi. Onyń aıtýynsha, jol kartasy, tsıfrlyq servıster jáne jańartylǵan zańnama arqyly otbasylardyń qaryz júktemesin azaıtýǵa jáne qarjylyq turaqtylyǵyn kúsheıtýge naqty jaǵdaı jasalyp otyr.
Qarjy naryǵyn retteý jáne damytý agenttiginiń tóraǵasy Mádına Ábilqasymova «Qaryzsyz qoǵam» jobasy nesıe bereshegi máselesin júıeli túrde sheshýdiń naqty quralyna aınalǵanyn atap ótti. Onyń aıtýynsha, «AMANAT» partııasynyń qoldaýymen jáne qarjy uıymdarynyń belsendi qatysýymen joba naqty nátıjelerge qol jetkizip, azamattardy qorǵaýdyń tıimdi modelin qalyptastyrdy.
Sondaı-aq Oqý-aǵartý mınıstri Juldyz Súleımenova, «Qaryzsyz qoǵam» jobasynyń ambassadory, Májilis depýtaty Dáýlet Muqaev ta óz pikirlerin bildirdi.
Sonymen qatar is-sharaǵa beınekonferentsbaılanys rejımi arqyly barlyq óńir men respýblıkalyq mańyzy bar qalalar ákimderiniń orynbasarlary, mentorlar, zań klınıkalary, óńirlik úılestirýshiler jáne jobaǵa atsalysyp júrgen azamattar qatysty.
Kezdesý sońynda «Qaryzsyz qoǵam» jobasynyń qatysýshylaryna, seriktesteri men sarapshylaryna partııalyq marapattar men alǵys hattar tabystaý saltanaty ótti.