«Qaryzsyz qoǵam»: Mıllıonnan asa azamat qarjylyq saýat boıynsha kómek alady

ASTANA. KAZINFORM — Memleket basshysy óziniń Joldaýynda halyqtyń qarjylyq saýatyn arttyrý jáne qaryz júktemesin tómendetý máselesine aıryqsha toqtaldy jáne «Qaryzsyz qoǵam» jobasyn jalǵastyrýdyń mańyzyn atap ótti.

Jyl sońyna deıin joba mamandary mıllıonnan astam qazaqstandyqqa qyzmet kórsetedi dep boljanyp otyr.

— Qarjylyq saýattylyqty arttyrý máselesi áli de ózekti. «Qaryzsyz qoǵam» jobasyn jalǵastyrý qajet. Tek ótken jyly bul joba aıasynda 845 myń adam bilim alyp, zańgerlik kómekke júgindi. Jobanyń túpki maqsaty — tek qaryz júgin jeńildetý emes, halyqtyń tabysyn turaqtandyrý, — dedi Prezıdent óz Joldaýynda.

2025 jylǵy 2 aqpan men 25 tamyz aralyǵynda «Qaryzsyz qoǵam» aıasynda 51 myń adam oflaın-oqýdan ótti, 111 myń azamatqa zańgerlik keńes berildi jáne 174 836 qatysýshy onlaın-kýrstardy aıaqtady.

Jalpy 2025 jyldyń ózinde 336 myńnan astam adam kómek aldy. Jyl sońyna deıin kórsetiletin qyzmet kólemi 1 mıllıonǵa jetedi dep kútilip otyr. 

AMANAT partııasy usynǵan bul bastama azamattardy qoldaýdyń tıimdi quraly retinde ózin tolyq dáleldedi. Aldaǵy jyldary jobanyń aýqymyn keńeıtý, oqytýdyń jańa formalaryn engizý jáne otbasylardyń qarjylyq turaqtylyǵyn arttyrýǵa baǵyttalǵan tájirıbelik tetikterdi damytý kózdelip otyr.

Aıta keteıik, «Qaryzsyz qoǵam» jobasy 2022 jyldan beri júzege asyrylyp keledi. Jobanyń negizgi maqsaty — halyqtyń qarjylyq saýatyn arttyrý, qaryzǵa táýeldilikti azaıtý jáne jeke qarjyǵa jaýapkershilikpen qaraý mádenıetin qalyptastyrý.

Buǵan deıin Qazaqstanda kredıt alyp, qaryzǵa batqandar sany jóninde taldaý jasalǵan edi.