Qaryzy 82 myń teńge: Aqtóbede baý-baqsha ujymy kúzdiń sýyǵynda jaryqsyz qaldy
AQTÓBE. KAZINFORM - Aqtóbe qalasy «Gormolzavod» baý-baqsha ujymynyń 130-ǵa jýyq úıi jaryqsyz, jylýsyz qaldy. Olar 82 myń teńge qaryzy úshin elektr jelisinen ajyratylǵan. Jolǵa jınalǵan turǵyndarǵa ákimdik qyzmetkerleri men polıtsııa keldi.
Aqtóbe qalasynyń eski bóliginde ornalasqan saıjaı ujymynyń turǵyndary tús mezgilinde sóngen jaryq máselesin kesh bilgen.
Turǵyndardyń aıtýynsha, elektr togymen qamtamasyz etip otyrǵan «Energosıstema» JShS-i habarlama bermesten ajyratyp tastaǵan.
- Bizdiń transformator qalalyq turǵyn úı-kommýnaldyq sharýashylyq bólimine qaraıdy. Al ishki elektr jelisin jeke-jeke shyǵaryp, árqaısysy bólek tóleıtin etip qarastyrýdy talap etemiz. Búgin biz 8 saǵatqa jýyq jaryqsyz otyrdyq. Aldyn ala habarlamady, syrttan sóndirgen. Biz jóndeý jasap jatyr dep oıladyq. 80 myń dep aıtty qaryz. Ol kóp aqsha emes. Keler aıda da jabylar edi ǵoı. Kúz salqyn, qys túsedi endi,- dedi Saılaýbek Serikov.
Aqtóbe qalasy Jıenbaev kóshesine jınalǵan jurtqa polıtsııa men Almaty aýdany ákimdiginiń ókili keldi.
- Qazirgi tańda qala ákimi «Energosıstema» JShS basshysyna habarlasyp, máseleni anyqtady. Olardyń aıtýynsha, turǵyndardyń qaryzy bar eken. Turǵyndar 82 myń dep tur. Jylytý maýsymy kezinde jaryqty sóndirýge bolmaıtyny aıtyldy. Eger sóndirse, zań aıasynda shara qoldanýǵa týra keledi. Aıazdyń kezinde óshirgen durys emes,- dedi Almaty aýdany ákiminiń orynbasary Anýar Jańbyrov.
Jaryq saǵat 21:00 shamasynda jandy. Turǵyndar óz arasynan saıajaıǵa jaýapty tóraǵa saılap, erteń ákimdikpen birge elektr jelisin balansqa alý jóninde másele kóremek.
Eske salsaq, bıyl sý tasqynynan keıin Aqtóbede 500-den astam baǵana aýystyryldy.
