Bankter boryshkerlerdiń sanyn ósirýge jol bermegeni jón - Memleket basshysy

ASTANA. KAZINFORM - Bul týraly Memleket basshysy otandyq bıznes ókilderimen kezdesýinde aıtty. 

Qasym-Jomart Toqaevtyń pikirinshe, tek bıýdjet qarjysymen ekonomıkany jańǵyrtý múmkin emes. Atalǵan úderiske bankterdiń bári atsalysqany mańyzdy.

– Úkimet kredıt mólsherlemesin sýbsıdııalaý arqyly bank qarjysyn tartý týraly bastama kóterdi. Qarjy sektory osy mindetti oryndaýǵa belsendi qatysýǵa tıis.

Úkimet Kepildik qoryn qurý máselesin pysyqtap jatyr.

Budan bólek, Biryńǵaı jınaqtaýshy zeınetaqy qorynan «uzaq merzimge beriletin» qarjy tartylady. Bul – jetkiliksiz. Naqty sektordy kredıtteý kólemin arttyrý úshin basqa da usynystar qajet.

Men Úkimet otyrysynda Ulttyq qor el ekonomıkasynyń bir bólshegi ekenin aıttym. Keıbir sholýshylar, qoǵam qaıratkerleri Úkimettiń Ulttyq qordan jıi ári kóp qarjy alatynyn aıtady. Bul – qalyptasqan ahýalǵa baılanysty qabyldanǵan sheshim. Osyǵan bola «daǵdarysqa tap boldyq» dep baıbalam salatyndaı sebep kórip turǵan joqpyn. Qordy ne úshin qurdyq? Qor qarjysy memlekettik mańyzy bar mindetterden ózge maqsatqa jumsalyp jatsa bir jón. Sondyqtan taǵy da qaıtalap aıtamyn, bankter bızneske kómektesip, ekonomıkanyń damýyna qarjy salýǵa tıis.

Degenmen retteýshilik sharalardyń qatańdaǵanyna qaramastan, tutynýshylyq nesıe kólemi burynǵydaı ósip keledi. Byltyr ol 33 paıyzǵa ulǵaıdy. Al problemalyq boryshkerlerdiń sany 1,5 mıllıon adamnan asty. Qaryzǵa belshesinen batqan azamattarǵa kómektesý kerek. Bul – asa ózekti saıası másele. Sonymen qatar qarjylyq saýatty arttyrý, ásirese óskeleń urpaqtyń osy baǵyttaǵy bilimin jetildirý mańyzdy. Osy rette bankter problemalyq zaımdardy qaıta qarjylandyrý jumystaryn kúsheıtip, boryshkerlerdiń sanyn ósirýge jol bermegeni jón. Azamattarǵa alaıaqtyq jolmen rásimdelgen kredıtterge aıryqsha mán berý qajet, – dedi Memleket basshysy.

Buǵan deıin Memleket basshysy qosylǵan qun salyǵynyń mólsherlemesi saralanyp belgilenýge tıis ekenin aıtqan bolatyn.