«Qaryzǵa belsheden batqan»: ShQO-daǵy óńdeýshi kásiporyndar sýbsıdııany jyldap kútip otyr

ÓSKEMEN. KAZINFORM — Shyǵys Qazaqstan oblysyndaǵy óńdeýshi kásiporyndar sýbsıdııa ala almaı, dabyl qaqty.

ShQO Kásipkerler palatasy janyndaǵy kásipkerlerdiń quqyqtaryn qorǵaý jáne sybaılas jemqorlyqqa qarsy keńeste óńdeý ónerkásibiniń damýyn tejep otyrǵan máseleler talqyǵa salyndy. 

Aımaqtaǵy jetekshi sút óńdeýshi kásiporyndardyń biri — «Emıl» JShS basshysy memlekettik qoldaý baǵdarlamalary boıynsha beriletin sýbsıdııalardyń tólenbeı kelýi qıyndyq týdyrǵanyn aıtty.

— Tek bizdiń kásiporynǵa sýbsıdııa boıynsha qaryz 800 mln teńgeden asty. Sonyń 600 mln-y — aýyl sharýashylyǵy ónimin óńdeýge qatysty sýbsıdııa baǵdarlamasyna tıesili. Jyl saıyn osy qarajatqa úmit artyp kelemiz. Ony modernızatsııa men qurylys jumystaryna salǵymyz keledi. Alaıda qarjy ýaqtyly túspegendikten, eshteńe josparlaı almaı otyrmyz, — deıdi kompanııa dırektory Anna Aberle.

Mundaı jaǵdaı jalǵyz «Emılde» ǵana emes. ShQO Aýyl sharýashylyǵy basqarmasynyń málimetinshe, agroónerkásiptik keshendi nesıelendirý kezinde syıaqy mólsherlemesin sýbsıdııalaý boıynsha qaryz kólemi 10 mlrd teńgege jýyqtaǵan. Jyl sońyna deıin bul soma 16 mlrd teńgege jetýi múmkin degen boljam bar.

— Óńdeýshi kásiporyndarǵa arnalǵan úsh negizgi memlekettik qoldaý baǵdarlamasy bar. Birinshisi — aýyl sharýashylyǵy ónimin tereń óńdeý úshin satyp alýǵa ketken shyǵyndy sýbsıdııalaý, ekinshisi — agroónerkásip sýbektileriniń nesıesindegi syıaqy mólsherlemesin sýbsıdııalaý, úshinshisi — ınvestıtsııalyq salymdar úshin ketken shyǵynnyń bir bóligin óteý. Ókinishke qaraı, osy úsh baǵyttyń barlyǵynda jyl saıyn qaryz jınalyp keledi. Ásirese nesıe mólsherlemesin óteý boıynsha jaǵdaı asa kúrdeli. Biz árdaıym burynǵy jáne qazirgi qajettilikterdi eskerip ótinim beremiz. Alaıda tólem jergilikti bıýdjettiń lımıtterine táýeldi, — deıdi basqarma basshysynyń orynbasary Dılıara Jylqaıdarova.

Máseleniń kúrdelene túsýine zańdaǵy olqylyq ta sebep bolǵan. Qoldanystaǵy sýbsıdııalaý erejelerinde tólem jasaý merzimderi naqty kórsetilmegen. Bul bıznestiń zań júzinde óz múddesin qorǵaýyna múmkindik bermeı otyr.

Kásipkerlerdiń aıtýynsha, olar damýǵa quıylýǵa tıis qarajatty qaryzdardy óteýge jumsaýǵa májbúr.

— Memlekettik baǵdarlamalar bar. Biraq olar tek qaǵaz júzinde ǵana jumys isteıdi, — deıdi óńdeýshi kásiporyndardyń ókilderi.

Másele qadaǵalaý organdarynyń da nazaryn aýdartty. ShQO Prokýratýrasy men Memlekettik qyzmet isteri agenttigi bul túıtkildi sheshýge atsalyspaq.

— Atqarýshy organdar qarjylandyrý kólemin aldyn ala josparlap, óz mindettemelerin ýaqytyly oryndaýy tıis. Óńdeý sektorynyń turaqtylyǵy osyǵan tikeleı baılanysty, — deıdi Kásipkerlerdiń quqyqtaryn qorǵaý keńesiniń tóraǵasy Igor Shatskıı.

Óńir kásiporyndary osy jyldyń ekinshi jartyjyldyǵyn kútip otyr. Óıkeni osy ýaqytta qosymsha qarjy bólinýi múmkin.

Eske salsaq, osyǵan deıin mańǵystaýlyq kásipkerler halyqqa qyzmet kórsetý ortalyqtarynyń zańsyz qyzmetine shaǵymdanǵany habarlanǵan.