Qaryzdy resimdeý kezinde qosa qaryz alýshynyń jaýapkershiligi qandaı
ASTANA. KAZINFORM – Eger qaryz alýshy óz mindettemelerin oryndaýdy toqtatsa, kredıtor qosa qaryz alýshydan bereshekti tolyq nemese ishinara óteýdi talap etýge quqyly.
Agenttik azamattarǵa kredıt sharttary boıynsha mindettemelerdi qosa qaryz alýshy retinde qabyldaýǵa muqııat qaraýdyń mańyzdylyǵyn eske salady.
Qosa qaryz alýshy – qaryz alýshymen birge banktik qaryz shartyna qol qoıatyn jáne ol boıynsha mindettemelerdiń oryndalýyna birdeı jaýapty tulǵa. Eger qaryz alýshy óz mindettemelerin oryndaýdy toqtatsa, kredıtor qosa qaryz alýshydan bereshekti tolyq nemese ishinara óteýdi talap etýge quqyly.
Іs júzinde qosa qaryz alýshylar kóbinese ıpotekalyq qaryzdardy resimdeý kezinde qaryz alýshynyń óz kirisi kredıtti maquldaý úshin jetkiliksiz bolǵan kezde tartylady. Mundaı jaǵdaılarda bank qaryz alýshy men qosa qaryz alýshynyń jıyntyq kirisin eskeredi, bul qaryz alý yqtımaldyǵyn arttyrýǵa múmkindik beredi.
Bul rette qosa qaryz alýshy ózine negizgi qaryz alýshy sııaqty mindettemelerdi qabyldaıdy. Merzimi ótken bereshek týyndaǵan jaǵdaıda kredıtor oǵan shottaryndaǵy qarajatty esepten shyǵarýdy, múlkin óndirip alýdy jáne sot talqylaýyn qosa alǵanda, zańnamada kózdelgen óndirip alý sharalaryn qoldana alady.
Qosa qaryz alýshynyń mártebesi kepil berýshi (kepilger) mártebesinen ózgeshe ekenin eskerý qajet. Qosa qaryz alýshynyń kirisi kredıt somasyn aıqyndaý kezinde eskeriledi, al onyń jaýapkershiligi shart boıynsha mindettemelerdiń barlyq kólemine qoldanylady. Óz kezeginde kepil berýshiniń jaýapkershiligi berilgen kepildik sharttarymen shekteledi.
Qosa qaryz alýshy bolýǵa kelispes buryn, sharttyń talaptarymen muqııat tanysyp, negizgi qaryz alýshynyń qaryzdy óteýde qıyndyqtary týyndaǵan jaǵdaıda óziniń qarjylyq múmkindikterin obektıvti baǵalaýǵa, sondaı-aq mindettemeler qosa qaryz alýshylardyń sanyna qaramastan shart talaptary tolyq oryndalǵanǵa deıin saqtalatynyn eskerýge keńes beriledi.
Kredıt mámilesine qatysý týraly sheshim qabyldaý tereń oılanýdy jáne onymen baılanysty barlyq táýekeldi túsinýdi talap etedi. Yqtımal saldardy jetkilikti baǵalamaý aıtarlyqtaı qarjylaı salmaq salýy múmkin.
Aıta ketelik kredıtor qaı kezde qaryzdy kollektorlarǵa beretini týraly jazǵan edik.
