Káriz sýy Ertis ózenine quıylyp jatyr: ShQO ekologtary tekserý júrgizýde
ÓSKEMEN. QazAqparat – Shyǵys Qazaqstan oblysynyń ekologtary Óskemende káriz sýynyń Ertis ózenine quıylyp jatqandyǵy týraly áleýmettik jelide taraǵan vıdeoǵa qatysty tekserý júrgizýde, dep habarlaıdy QazAqparat tilshisi.
Áleýmettik jelide Óskemendegi «Riviera Residence» turǵyn úı keshenindegi káriz jelisiniń jumys istemeýi saldarynan jerge aqqan káriz sýynyń sol mańdaǵy baý-baqsha qoǵamdastyǵynyń aýmaǵy arqyly ótip, Ertis ózenine quıyp jatqandyǵy týraly aqparat tarady. https://www.instagram.com/p/Cpu_kYqsZ9E/ Osyǵan oraı ShQO Ekologııa departamentiniń mamandary tekserý jumystaryn qolǵa aldy.
«Departament qyzmetkerleri oqıǵa ornyna baryp, aǵyndy sý men topyraqtan synama aldy. Endi ondaǵy zııandy zattardyń bar-joǵyn anyqtaý úshin hımııalyq zertteýler júrgiziledi», - dep habarlady vedomstvo ókilderi.
Al Óskemen qalasy ákimdiginiń málimetine súıensek, «Riviera Residence» turǵyn úı keshenin «Óskemen Vodokonal» ShJQ balansyna berý týraly sheshim qabyldanǵan. Turǵyn úı-kommýnaldyq sharýashylyq bólimi búginde qajetti qujattardy daıyndap, kelissózder júrgizýde. Aldaǵy ýaqytta káriz sýyn qalalyq káriz jelilerine aıdaý úshin sorǵy stantsııalarynyń júıesin avtomattandyrý josparlanýda. Bul káriz sýynyń jer bederi men Ertis ózenine aǵýyna jol bermeıdi.
