Qaryz suraýshylar kóbeıedi: Lotereıadan aqsha utqandar aty-jónin nege jarııalamaıdy

ASTANA. KAZINFORM – Týrızm jáne sport vıtse-mınıstri Mıras Tólebaev qazaqstandyqtardyń lotereıadan aqsha utqany jaıly málimetti jarııalaýdan nege bas tartatynyn aıtty.

«Ótken jyldyń qorytyndysy boıynsha búkil lotereıalyq ónimderdiń utys qory, ıaǵnı, aýdarylǵan utys kólemi 305 mlrd teńge boldy. Al utys operatorlarynyń jalpy aqsha aınalymy 356 mlrd teńgege jetken. Biraq biz azamattardyń utys utqany týraly málimetterdi jıi estı bermeımiz. Óıtkeni lotereıa jeńimpazdarynyń kóbi, 90 paıyzy dep aıtýǵa bolady, „ınkognıto“ mártebesinde qalǵandy jón kórip, suhbat bermeıdi. Fotosessııadan bas tartyp, jarııalyqtan qashady. Utys somasy men jeke deregin jarııalaǵan jaǵdaıda sotqa beretinin aıtyp qorqytady», — dedi ol ortalyq kommýnıkatsııalar qyzmetinde ótken brıfıngide.

Spıkerdiń aıtýynsha, utysyn alýǵa maska kıip, kózáınek taǵyp keletin jaıttar bolǵan.

«Onyń sebebi túsinikti — keıbireýi qaýipsizdigine alańdaıdy, qaryz suraýshylar kóbeıedi, jeńisti toılaýǵa shaqyratyndar bolady», — dedi Mıras Tólebaev.