Qaryz hám aryz: Astana aýrýhanalarynyń máselesi shash-etekten
ASTANA. KAZINFORM – Búginde elordaǵy medıtsınalyq uıymdardyń kredıtorlyq bereshegi artpasa, kemigen emes. Kommýnaldyq qyzmetten bastap dári jetkizýshilerge deıin qaryz. Buǵan dárigerlerdiń qyzmetine kóńili tolmaıtyn emdelýshilerdiń aryz-shaǵymyn qosyńyz. Saldarynan aýrýhana basshylary ózderi de em izdeıtin kúnge jetken. Bul problema búgin Astana qalasynyń qoǵamdyq keńesi uıymdastyrǵan qoǵamdyq tyńdaý barysynda kóterildi. Turǵyndardyń kóńili tolmaıtyn MÁMS máselesi de sóz boldy.
Astana qalasynyń qoǵamdyq densaýlyq saqtaý basqarmasynyń basshysy Álııa Rústemovanyń aıtýynsha, MÁMS arqyly qarjylandyrylatyn basqarmaǵa qarasty medıtsınalyq uıymdardyń bıýdjeti bıyl 120,4 mlrd teńgeni quraǵan. Bul – ótken jylmen salystyrǵanda 2,5% paıyzǵa artyq. Dese de, medıtsınalyq uıymdardyń kredıtorlyq bereshegi azaımaı tur.
«Medıtsınalyq uıymdardy qarjylandyrýdyń jetkiliksizdiginen kredıtorlyq bereshek qalyptasty. Búginde olardyń kredıtorlyq bereshek somasy 14,7 mlrd teńgeni quraıdy. Onyń ishinde «SK-Farmatsııa» JShS-ǵa 4,5 mlrd, ózge de jetkizýshilerge 10,2 mlrd teńge bereshek bar. 2022-2023 jyldary merzimi ótken kredıtorlyq bereshek somasy 3,3 mlrd teńgege teń. Atap aıtsaq, №1 kópsalaly qalalyq aýrýhananyń bereshegi - 2,2 mlrd teńgege, qalalyq ftızıopýlmonologııa ortalyǵynyń qaryzy - 662 mln teńgege jáne qalalyq ınfektsııalyq ortalyǵynyń bereshegi 398 mln teńgege jetti», - dedi Álııa Rústemova.
Onyń aıtýynsha, kredıtorlyq bereshektiń paıda bolýynyń negizgi sebepteri tómendegideı:
– dári-dármekter men medıtsınalyq buıymdarǵa, azyq-túlikke, kommýnaldyq jáne basqa da qyzmetterge baǵanyń jyl saıynǵy ósýin kózdemeıtin tómen tarıfter;
– medıtsına qyzmetkerleriniń jalaqysyn arttyrý;
– kórsetiletin qyzmetter kólemine kelisilgennen tómen sharttar jasasý.
Budan bólek, aǵymdaǵy kredıtorlyq bereshektiń paıda bolý sebebi medıtsınalyq saqtandyrý qorynyń fılıaly tarapynan ýaqtyly qarjylandyrylmaýynan týyndaǵan eken. Máselen, búginde medıtsınalyq uıymdarǵa aǵymdaǵy jyldyń 4 aıynda ǵana oryndalǵan jumystar aktileri boıynsha qarajat tólenipti.
Quzyrly organdar №1 qalalyq kópbeıindi aýrýhananyń kredıtorlyq bereshegin jergilikti bıýdjet qarajaty esebinen óteý tetikterin qarastyrýda. Bul másele bıyl 2 qyrkúıekte máslıhat otyrysynda kóterilmek.
