Qaryz alýshylarǵa múmkindik: QazAgroQarjy aıyppuldardy esepten shyǵarady
ASTANA. KAZINFORM — QazAgroQarjy aıyppuldardy esepten shyǵarý aktsııasyn jarııalaıdy, dep habarlaıdy Aýyl sharýashylyǵy mınıstrliginiń baspasóz qyzmeti.
«Báıterek» Ulttyq ınvestıtsııalyq Holdınginiń kompanııalar tobyna kiretin «QazAgroQarjy» AQ kompanııa klıentteri úshin eseptelgen ósimpuldar men aıyppuldardy esepten shyǵarý aktsııasyn iske qosady. Aktsııa qaryz alýshylardyń barlyǵyna qoldanylady.
Aktsııa 2026 jylǵy 15 qańtardan bastap 1 naýryzdy qosa alǵanda qoldanysta bolady.
— Aktsııa sheńberinde «QazAgroQarjy» qarjy lızıngi sharttary boıynsha aqshalaı mindettemelerdi ýaqytyly oryndamaǵany úshin eseptelgen turaqsyzdyq aıybynyń 100%-yn esepten shyǵarady. Sharaǵa qatysýdyń negizgi sharty — qarjylandyrý sharty boıynsha negizgi borysh pen syıaqyny aktsııanyń qoldanylý merzimi aıaqtalǵanǵa deıin tolyq óteý. Bul rette aktsııany ótkizýdiń búkil kezeńi ishinde bereshekti ishinara tólemdermen óteýge múmkindik beriledi, — delingen habarlamada.
Sondaı-aq mindettemeleri boıynsha buryn sot sheshimderi shyǵarylǵan klıentterge de, olar sot sheshimi boıynsha bereshek somasyn tolyq ótegen jaǵdaıda qoldanylady (aktsııa sheńberinde esepten shyǵarýǵa jatatyn ósimpuldy qospaǵanda).
Aktsııaǵa qatysý úshin qaryz alýshylar ózine qyzmet kórsetetin «QazAgroQarjy» AQ fılıalyna ótinishpen júginýi qajet.
Fılıaldardyń baılanys telefondary men mekenjaılary www.kaf.kz saıtynda kórsetilgen. Call-ortalyǵy: +7 (717-25) 5-77-55, 9077, 1408.
Budan buryn «QazAgroQarjy» óz lızıng baǵdarlamasyn iske qosqanyn jazǵan edik.