Qaryz alýshylardyń quqyǵyn qorǵaý úshin zańnamalyq túzetýler enedi – Mınıstr
Qaryz alýshylardyń quqyǵyn qorǵaýdy kúsheıtý boıynsha zańnamalyq túzetýler pysyqtalyp jatyr. Bul týraly QR Premer-Mınıstriniń orynbasary – Qarjy mınıstri Erulan Jamaýbaev aıtyp berdi, dep habarlaıdy Kazinform.
Mınıstrdiń aıtýynsha, halyqtyń shamadan tys nesıe alýyn tómendetý keshendi sharalardy kózdeıdi, ásirese bankter men mıkroqarjylyq uıymdardyń prýdentsıaldyq retteýin qaıta qaraýdy talap etedi. Bul turǵyda qaryz alýshylardyń quqyǵyn qorǵaýdy kúsheıtý boıynsha zańnamalyq túzetýler pysyqtalyp jatyr.
«Atap aıtqanda, túzetýler toptamasy halyqtyń shamadan tys nesıe alýyn tómendetýge jáne boryshtyq júktemeniń ósýin shekteýge, alaıaqtyqqa qarsy is-qımylǵa jáne qarjylyq qyzmet tutynýshylardyń quqyǵyn qorǵaýǵa; bank ombýdsmanynyń qyzmetin kúsheıtýge baǵyttalǵan. Sondaı-aq kepilsiz onlaın-kredıtteý segmentinde táýekelderdi azaıtý máseleleri pysyqtalyp jatyr», - dedi Qarjy mınıstri Parlament tyńdaýynda.
Atalǵan problemalardy sheshý tetikteriniń biri – jeke tulǵalardyń bankrottyǵy men tólem qabiletin qalpyna keltirý rásimin qoldaný bolyp otyr. Qazir tıisti zań normalary kúshine enip, jumys istep jatyr.
«Onyń ishinde neǵurlym suranysqa ıe bolǵany – sottan tys bankrottyq rásimi. Ony tek bankter, mıkroqarjy uıymdary jáne kollektorlyq agenttikter aldyndaǵy qaryzdar boıynsha ǵana qoldanýǵa bolady. Azamattar ótinishterdi Halyqqa qyzmet kórsetý ortalyqtarynda, elektrondy úkimet portaly arqyly (eGov.kz.), sondaı-aq E-salyq Azamat nemese eGov Mobile mobıldi qosymshalary arqyly bere alady», - dedi E.Jamaýbaev.
Jeke tulǵalardyń bankrottyǵy boıynsha «Qoldau» atty jańa aqparattyq júıe iske qosylǵan. Bul aqparattyq júıe arqyly ótinish berý múmkindigin jáne ótinish berýshiniń tıisti krıterıılerge sáıkestigin 24 memlekettik organ men uıymdardyń bazalary arqyly avtomatty túrde tekserýge bolady.
Aıta keteıik, búgin Májiliste «Halyqtyń shamadan tys kredıt alýyn azaıtý jáne qarjylyq saýattylyqty arttyrý» taqyrybynda Parlament tyńdaýy ótti.