Qaryz alýshylardy qatań baǵalaý sharalary engiziledi
ASTANA. KAZINFORM - Jeke tulǵalardyń kredıtteri boıynsha kapıtaldyń kontrtsıkldi býferin engizý týraly sheshim qabyldandy. Bul týraly Ulttyq bank tóraǵasy Tımýr Súleımenov aıtty.
- Makro jáne mıkroprýdentsııalyq bastamalar aıasynda da jumys júrip jatyr. Jeke tulǵalardyń kredıtteri boıynsha kapıtaldyń kontrtsıkldi býferin engizý týraly sheshim qabyldandy. Qarjy retteý agenttigimen birlesip, qaryz júktemesiniń koeffıtsıenti men qaryzdyń tabysqa qatynasy sııaqty qosymsha quraldardy jetildirý jumystary júrgizilip jatyr. Bul tutynýshylyq kredıtteý segmentindegi «qyzyp» ketýdi tómendetýge múmkindik beredi.
Sondaı-aq, agenttik qaryz alýshylardy, ásirese burynnan nesıelik merzimin ótkizip alǵandardy neǵurlym qatań baǵalaý sharalaryn engizýdi josparlap otyr. Bul tutastaı alǵanda tutynýshylyq kredıtteý salasyndaǵy «qyzyp» ketýdi tómendetýge yqpal etedi, - dedi Tımýr Súleımenov.
Onyń aıtýynsha, Úkimetpen birlesip teńgerimdi fıskaldyq saıasatqa kóshý boıynsha da ózara áreket jalǵasyp jatyr.
- Sondaı-aq, Úkimetpen birge ınflıatsııa deńgeıin baqylaý jáne tómendetý sharalary keshenin jańarttyq. Qujatqa óndiristi ulǵaıtý, logıstıka men júk saqtaý júıesin damytý, baǵa belgileýde ashyqtyqty arttyrý, ústeme baǵalardy baqylaý, monopolııaǵa qarsy jáne syrtqy saýdany retteý, sondaı-aq bizdiń tarapymyzdan – aqsha-kredıt saıasaty boıynsha sharalar engizý máseleleri qamtylǵan, - dedi ol.
Buǵan deıin Ulttyq bank bazalyq mólsherlemeni taǵy da 16,5 paıyz deńgeıinde qaldyrǵanyn jazǵan edik.