Qaıtys bolǵan qaryz alýshynyń nesıesin qandaı jaǵdaıda saqtandyrý kompanııasy óteıdi
ASTANA. KAZINFORM – Qaryz alýshynyń ómiri saqtandyrylǵan bolsa, ol qaıtys bolǵan jaǵdaıda nesıesin saqtandyrý kompanııasy óteýi múmkin. Bul týraly Kazinform agenttiginiń resmı saýalyna Qarjy naryǵyn retteý jáne damytý agenttiginiń resmı jaýabynda aıtylǵan.
– Qaryz alýshy qaıtys bolǵan jaǵdaıda saqtandyrý kompanııasy kredıt boıynsha tólem jasaýy úshin shartta adamnyń qaıtys bolýy saqtandyrý jaǵdaıy retinde kórsetilýi kerek. Osylaısha, saqtandyrý uıymy shartta belgilengen talaptar men tártipke sáıkes saqtandyrý tólemin júzege asyrady, - delingen habarlamada.
Eger saqtandyrý sharty boıynsha tólem bankke beriletin bolsa, bul qarajat kredıt qaryzyn óteýge jumsalady.
– Eger saqtandyrý tólemi kredıtti tolyq jabýǵa jetpese, qaryzdyń bir bóligi ótelmeı qalýy múmkin. Biraq bul qalǵan bereshekti muragerler mindetti túrde tolyq tóleýi kerek degendi bildirmeıdi. Sondaı-aq, saqtandyrý kompanııasy tólemdi saqtandyrý shartynda jazylǵan talaptarǵa sáıkes júrgizedi. Sondaı-aq zańda saqtandyrý kompanııasy tólem jasamaýǵa quqyly bolatyn jaǵdaılar da qarastyrylǵan, - dep tolyqtyrdy Oljas Ramazanov.
