Qaryz alýshy qaıtys bolsa, ıpotekaǵa alynǵan páter kimge qalady
ASTANA. KAZINFORM – Ipotekaǵa páter alǵan adam qaıtys bolǵan jaǵdaıda baspana da, onyń ıpotekalyq qaryzy da muragerine ótýi múmkin. Bul týraly Kazinform agenttiginiń resmı saýalyna Qarjy naryǵyn retteý jáne damytý agenttiginiń Syrtqy kommýnıkatsııalar basqarmasynyń basshysy – baspasóz hatshysy Oljas Ramazanov jaýap berdi.
Onyń aıtýynsha, qaryz alýshynyń qaıtys bolýy ıpotekany avtomatty túrde toqtatpaıdy.
– Ipotekalyq qaryz sharty boıynsha mindettemeler qaryz alýshynyń qaıtys bolýyna baılanysty toqtatylmaıdy jáne mura qabyldanǵannan keıin muraǵa qaldyrylatyn múlikke, onyń ishinde kepildegi jyljymaıtyn múlikke quqyqtarmen birge muragerge ótedi, - dedi ol.
Osylaısha, ıpotekasy áli tolyq tólenbegen páter de muraǵa qalady. Biraq páter banktiń kepilinde qala beredi.
Oljas Ramazanovtyń túsindirýinshe, qaryz alýshy qaıtys bolǵannan keıin ıpotekadaǵy páter birden bankke ótip ketpeıdi. Murager murany qabyldasa, páter de, oǵan baılanysty ıpotekalyq mindetteme de birge ótedi.
