Qaryz alýshy endi bank kelisiminiń talaptaryn ózgertý úshin ombýdsmenge júgine alady
ASTANA. KAZINFORM – 21 jeltoqsanda nesıe berý kezindegi táýekelderdi tómendetý, zaem alýshylardyń quqyǵyn qorǵaý máseleleri boıynsha keıbir zańnamalyq aktilerge engizilgen ózgerister kúshine enedi.
«Bankter jáne bank qyzmeti týraly» zańnyń 36-babyna zaem alýshyǵa bank sheshimi shyqqannan soń nemese banktiń nesıe jónindegi kelisim talaptaryn ózgertý týraly eki tarapty da qanaǵattandyratyn sheshimge kele almaǵan jaǵdaıda 15 kúntizbelik kún ishinde bank ombýdsmenine júginýine múmkindik beretin norma engizildi. Shart – qaryz alýshy bir ýaqytta bankti (nemese bank operatsııalarynyń jekelegen túrlerin júzege asyratyn uıymdy) de bul áreketinen habardar etýi kerek.
Bank ombýdsmeni jeke tulǵa áýeli bankke júgingenin jáne onda eki tarapty da qanaǵattandyratyn sheshimge kele almaǵandaryn dáleldese, ótinishti qaraıdy.
Sondaı-aq, zań boıynsha bank ombýdsmeniniń de mártebesi aıqyndaldy.
Bank ombýdsmeni – jeke tulǵanyń jáne banktiń quqyqtary men zańmen qorǵalatyn múddelerin qanaǵattandyratyn kelisimge qol jetkizý maqsatynda jeke tulǵanyń bankpen jasasqan qaryz týraly kelisiminen týyndaǵan kelispeýshilikterdi sheshetin jeke tulǵa.
Qazaqstan Respýblıkasynyń keıbir zańnamalyq aktilerine nesıeleýdegi táýekelderdi azaıtý, qaryz alýshylardyń quqyqtaryn qorǵaý máseleleri boıynsha engizilgen ózgerister jáne tolyqtyrýlarmen myna silteme arqyly tanysýǵa bolady.