Qaryz alyp, aýyzashar berýge bola ma

ASTANA. KAZINFORM – Jaıylatyn kez kelgen dastarhanda ysyrapqa jol birilmeý kerek. Bul týraly elordada ótken baspasóz máslıhatynda Bas múftı Naýryzbaı qajy Taǵanuly málim etti.

- Islam dinimiz adamǵa eshqashan qıynshylyqty buıyrmaıdy. Sondyqtan shamasy kelgen adam sadaqa men aýyzashar beredi. Qaryzǵa batyp, aýyzashar bergennen góri, aýyzashar berýge nıet qylyp, ıaǵnı kishkene qurma nemese bir jutym sýdy aýyzashar retinde berse, sonyń ózi jetkilikti. Osy arqyly aýyzashardyń saýabyn alady, – dedi Naýryzbaı qajy Taǵanuly.

Osy oraıda Bas múftı sharıǵat boıynsha jaıylatyn kez kelgen dastarhanda ysyrapqa jol birilmeıtinin eske saldy.

- Qazir aqparattyq tehnologııanyń damyǵan zamany. Biz de zaman úderisinen barynsha qalys qalmaýǵa tyrysyp, qasıetti Ramazan aıy qarsańynda arnaıy birneshe jobany qolǵa aldyq. Naqty aıtqanda, MuftyatBot dep atalatyn Telegram-botyn iske qostyq. Jańa Telegram-bot arqyly jalpy dinı suraqtarǵa jaýap alýǵa bolady. ıAǵnı bul joba sharıǵat máseleleri boıynsha aqparat berýge jáne keńes usynýǵa arnalǵan. Sonymen qatar, múftııat mamandary oblys, qala, aýdan jáne aýyldyń, barlyǵyn eseptegende elimiz boıynsha 6 000 eldi mekenniń oraza jáne namaz kestesin joǵary sapada PDF formatta muftyat.kz saıtyna jarııalady. Ózińizge qajetti óńirdiń oraza jáne namaz kestesin saıtymyzdan jáne Telegram bottan júktep alýǵa bolady, - dedi Bas múftı.

Sondaı-aq Múftııat janyndaǵy Dinı aqparat berý, ıaǵnı koll ortalyǵy táýlik boıy jumys isteıdi. Koll ortalyqtyń nómiri – 8 707 233 30 30.

Qazaqstan musylmandary dinı basqarmasy ortaq pátýaǵa sáıkes, qasıetti Ramazan aıy 1 naýryzda bastalatynyn habarlap otyr. Naýryz aıynyń 26-nan 27-ne qaraǵan tún — Qadir túni, al 30 naýryz — Oraza aıt merekesi.

Elimizdiń Bas múftıi Naýryzbaı qajy Taǵanulynyń tóraǵalyǵymen ótken Qazaqstan musylmandary dinı basqarmasynyń tóralqa májilisinde pitir sadaqasy elimiz boıynsha eki keli unnyń ortasha baǵasy negizinde 655 teńge bolyp bekitildi.

Budan buryn habarlanǵandaı, Bas múftı kásipkerlerdi azyq-túlik baǵasyna jeńildik jasaýǵa shaqyrdy.