Qarııanyń umytyp ketken sómkesi HQKO-da jurtty dúrliktirdi
QARAǴANDY. QazAqparat - Qaraǵandyda Halyqqa qyzmet kórsetý ortalyǵyna (HQKO) barǵan qarııa ydys-aıaq salynǵan joldorbasyn umytyp ketip, saldarynan HQKO-dan adamdar túgel evakýatsııalandy, dep habarlaıdy «QazAqparat» HAA tilshisi.
Oblystyq ishki ister departamenti baspasóz qyzmetiniń jetekshisi Baqytjan Qudııarovtyń habarlaýynsha, HQKO-daǵy kúdikti sómke týraly habarlama kezekshi bólimge saǵat 12.40-ta túsken.
«Polıtsııa qyzmetkerleri 70 adamdy - kelýshiler men tehnıkalyq qyzmetkerlerdi qaýipsiz jerge shyǵardy. Oqý-jattyǵý vzvodynyń mamandary joldorbany ashqanda, ishinen ydys shyqty», - dedi Baqytjan Qudııarov.
13.40-ta shuǵyl áreketterdi toqtatýǵa komanda berildi. Polıtseıler egde jastaǵy er adamnyń HQKO-ǵa kelip, joldorbasyn umytyp ketkenin anyqtady.
