Qarııany uryp, tonaǵan jambyldyq áskerı qyzmetker sottaldy

Qylmystyq is Shymkent garnızonynyń sotynda qaraldy.   

Jambyl oblysynyń Qumjota aýylynda turatyn serjant jeke kóligimen jasy kelgen sharýanyń shalǵaıdaǵy qora-jaıyna jetkizip tastaıdy. Zeınet jasyndaǵy kisiniń aýyldan alshaq jerde áıelimen ǵana turatynyn baıqaǵan. Keıinnen aqsaqaldy Taraz qalasynyń mańyndaǵy mal bazarda 10-15 qoı satyp júrgenin kóredi. Osydan keıin áskerı qyzmetkerge tonaý týraly aram oı keledi. Ol jumyssyz júrgen eki aýyldasyn ertip, qoıshynyń úıine barady. Jol jónekeı arnaıy áskerı kıimin kıip, Keńes aýylynan 3 shaqyrym jerdegi «Podhozǵa» kelgen. Qora-jaıdyń aldyna jaqyndaǵanda úı ıesi shyǵyp, kim ekendikterin surapty. Sol kezde serjant ózin polıtsııa qyzmetkerimin dep tanystyryp, úıdegi qarýdyń qujattaryn tekserýge kelgenin aıtady. Zeınetker oǵan senip, qujattardy kórsetkende áskerı ózine kórsetilgen qujattyń merzimi ótip ketip ketkenin aıtqan. Aıyppul salmaý úshin 30 myń teńge talap etipti. Oǵan aqsha joq dep aıtqan aqsaqaldy uryp, jerge qulatqan.  Sybaılastarymen birge qarııa men áıeliniń eki qol-aıaqtaryn baılap tastaıdy. Artynsha úıdegi seıftiń ishinen  1 300 000 teńge aqshany jáne uıaly telefonyn alyp, oqıǵa ornynan boı tasalaǵan. Osylaısha jábirlenýshilerge jeńil  dene jaraqatyn salǵan.

Keıinnen polıtseıler qylmys jasaǵandardy qolǵa túsirip, qamaýǵa aldy. Tergeý barysynda olardyń jasaǵan qylmystary dáleldendi. Biraq sotta jábirlenýshiler keltirilgen shyǵyn qaıtarylǵanyn aıtypty. Osy mán jaılardyń barlyǵyn eskergen sot áskerı bólimniń serjanty men bir sybaılasyn bes jarym jylǵa bas bostandyǵyn aıyrýǵa, jazasyn shartty merzimde óteý týraly úkim shyǵardy.

 Al úshinshi aıyptalýshy buryn sottalýyna baılanysty 5 jylǵa túrmege qamaldy. Onyń qylmystyq múlki tárkilenip, jazasyn katań tártiptegi kolonııasynda óteý belgilendi.

Sot úkimi kúshine endi.