Qarııany órtten qutqarǵan aǵaıyndy oqýshylarǵa mınıstr alǵys aıtty

QARAǴANDY. QazAqparat - 23 qańtarda saǵat 16:38-de Qaraǵandy qalasy Jeńis kóshesiniń boıynda órt shyqqany týraly habarlama kelip túsken, dep habarlaıdy QazAqparat TJM-ge silteme jasap.

6 sharshy metr aýmaqta turǵyn úıge jalǵanǵan qazandyqtyń jıhazy, turmystyq tehnıkasy, ishki aǵash qaptamalary, tóbesi janǵan. Órtti órt sóndirýshiler sóndirdi.

Órt kezinde qardy tazalaýǵa kórshi úıde turatyn 15 jastaǵy Erasyl men 14 jastaǵy Qanat kómektesken. Olar kórshileriniń úıinen tútin shyǵyp jatqanyn kórdi jáne qutqarýshylardy shaqyrdy. Jigitter esh oılanbastan kómekke umtyldy, tútin ishinde qalǵan qarııany qutqardy.

Kóp uzamaı Oqý-aǵartý mınıstri Ǵanı Beısembaev egde jastaǵy kórshilerin órtten qutqarǵan qaraǵandylyq oqýshylarǵa, aǵaıyndy Erasyl men Qanat Smaǵulovtarǵa alǵys hat joldady. Jetkinshekterdiń arqasynda órtten eshkim zardap shekken joq. Olar qaladaǵy №12 mektepte bilim alady.

«Senderge adam ómirin qutqarýǵa qadam basqan erjúrek batyrlyqtaryń úshin zor alǵysymdy bildiremin. Óz ómirlerińe qaýip tónip tursa da, táýekelge bel býyp, naǵyz erlik jasap, úlken qaıǵynyń aldyn aldyńdar. Mundaı áreketke barýdyń ózi úlken júrektilik pen batyldyqty, qaısarlyqty talap etedi. Jasaǵan qadamdaryń rýhy berik, naǵyz batyrdyń áreketi dep bilemin.Sender bolashaqta ata-babamyzdan mıras bolyp qalǵan elimizdiń keń dalasyn, asqar taýyn, sarqyrap aqqan kók ózenin qorǵaıtyn, halyqtyń maqtanyshyna aınalatyn naǵyz patrıot azamat bolyp shyǵatyndaryńa senimim mol.Bolashaqtaryń jarqyn bolsyn!», – dep jazdy mınıstr joldaǵan alǵys hatynda.

Foto: gov.kz