Qarııalardyń densaýlyǵyn tekserý úshin Shymkent dárigerleri saıabaqqa keldi
ASTANA. QazAqparat - Shymkent qalasynyń Ortalyq saıabaǵynda salaýatty ómir saltyn qalyptastyrý maqsatynda «Altyn jas-Zolotoı vozrast» atty uranmen Qarttar kúni atalyp ótti. Densaýlyq saqtaý basqarmasy uıymdastyrǵan sharaǵa oblys ákimi Janseıit Túımebaev arnaıy atbasyn buryp, ardagerlerdi mereıli merekesimen quttyqtady. Atalar men ájelerge erekshe qurmet kórsetilip, syı-sııapattar tapsyryldy, dep habarlaıdy QazAqparat oblystyń Densaýlyq saqtaý basqarmasyna silteme jasap.
Bul kúni saıabaqqa kelgen qarııalardy medıtsınalyq joldamasyz oblystyń bilikti dárigerleri tegin dıagnostıkalyq tekserýden ótkizip, keńesterin berdi. Olarǵa stomatologtar, kardıologtar, terapevter, endokrınologtar men okýlıster qyzmet kórsetti. Zeınetkerler qan qysymdaryn ólshetip, kózderin kórsetti, ÝDZ apparatynyń kómegimen aǵzasyn teksertip, ekspress-analızder tapsyrdy.
Saıabaqqa jınalǵan jurt kontserttik baǵdarlamamen qatar ardagerler arasynda ótken shahmat týrnıriniń kýási boldy. Kóterińki kóńil-kúı syılaýǵa umtylǵan myń buralǵan kásibı bıshiler, ánshilermen jarysa oblystaǵy yntymaǵy jarasqan barlyq etnos ókilderi óz tilderinde ánder shyrqady. Qazan aıynyń alǵashqy kúni Shymkenttiń shyraıy ardagerlermen ajarlana túskeni anyq.
Kúni keshe, 30 qyrkúıekte egde jastaǵy adamdardyń densaýlyǵyn nyǵaıtý jáne salaýatty ómir daǵdylaryn qalyptastyrý maqsatynda oblys kóleminde aýrýhana, emhanalarda «Ashyq esik» kúnderi uıymdastyrylǵan bolatyn. Mundaı shara 7 qazanda da jalǵasyn tabady. Al 1 qazannan bastap bir aı kóleminde oblys boıynsha Uly Otan soǵysynyń ardagerlerine medıtsına qyzmetkerleri úılerine baryp, medıtsınalyq kómekter kórsetedi.
