Qarııalardy azaptap kelgen Aqsý pansıonatyn qarjylandyrý toqtatylýy múmkin
PAVLODAR. KAZINFORM - Aqsýdaǵy qarttar pansıonaty óńirlik jumyspen qamtýdy úılestirý jáne áleýmettik baǵdarlamalar basqarmasynyń memlekettik áleýmettik tapsyrysy aıasynda qarjylandyrylyp kelgen.
Qazir jaýapty organ kelisimshartty buzyp, qarjylandyrýdy toqtatý boıynsha is-sharalar júrgizip jatyr.
Pavlodar oblysy jumyspen qamtýdy úılestirý jáne áleýmettik baǵdarlamalar basqarmasynyń málimetinshe, pansıonatta múgedektigi bar 15 qarııa turyp kelgen. Mekeme memlekettik áleýmettik tapsyrys aıasynda qarjy alyp otyrǵan. Byltyr sáýir aıynda basqarma mamandary arnaıy áleýmettik qyzmet kórsetý standarttarynyń oryndalýy boıynsha monıtorıng júrgizý maqsatymen pansıonatta bolǵan. Sol ýaqytta qarııalardy azaptaý, olarǵa qatigezdikpen qaraý derekteri anyqtalmapty.
- Odan soń qyrkúıek aıynda Pavlodar oblysyndaǵy ulttyq preventıvti mehanızm qatysýshylary atalǵan pansıonatqa bardy. Mamandar shaǵymdar men usynystar jáshigin ornatý, azyq-túlik qoımasyn jóndeý, táýliktik synamalardy irikteý, sýjylytqyshtar qoıý, dári-dármekti saqtaý seıfterin, mekemege kireberiske pandýs ornatý týraly usynystaryn jetkizgen. Qarttar úıiniń turǵyndaryn azaptaý jáne qatigezdikpen qaraý derekteri ol tusta da baıqalmady, - dep habarlady jaýapty basqarmadan.
Qazirgi ýaqytta Aqsý qalasynyń prokýratýrasy atalǵan pansıonatqa baılanysty sotqa deıingi tergeý-tekserý sharalaryn júrgizip jatyr. Onyń qorytyndysy shyqqan soń oblystyq jumyspen qamtýdy úılestirý jáne áleýmettik baǵdarlamalar basqarmasy memlekettik satyp alýlar týraly shartty buzý jáne kináli tulǵalardy jazaǵa tartý boıynsha sharalar qabyldaıdy.
Eske sala keteıik, aqsýlyq prokýrorlar qart adamdardy azaptaý faktilerin anyqtady.