Qarııalar bata berýden jarysty

ShYMKENT. QazAqparat - Ońtústik Qazaqstan  oblysynda batagóı qarııalar men el aǵalary arasynda «Qazynaly qarııa» atty saıys ótti. Arys aýdanynda uıymdastyrylǵan saıysta qazynaly qarttar qanatty sóz aıtýdan synǵa tústi, dep habarlaıdy QazAqparat tilshisi.

Shara Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasyn júzege asyrý aıasynda ótti. Maqsaty - kópti kórgen danagóı qarttarymyzdyń ónegeli ómirin úlgi ete otyryp, ǵıbrat bolarlyq sózderin jas urpaqtyń boıyna sińirý.  Sondaı-aq asyl qazyna qarııalardyń boıyndaǵy qasıetterin dáripteý arqyly jastardy ımandylyqqa tárbıeleý, úlkenge qurmet, kishige izet kórsetýdi úıretý. Baıqaý talaptary boıynsha jarysqa 60 jastan asqan aqsaqaldar men el aǵalary qatysty. Olar maqal-mátel men  ónegeli-ósıet sózder aıtýdan saıysty.  Bata berý men óner baıqaýynan baqtaryn synap kórdi.  Aýyl aqsaqaldary, sondaı-aq tosynnan qoıylǵan suraqtarǵa ataly sózben jaýap qaıtaryp, ár baǵytta beriletin batalardyń mánin túsindirip otyrdy.

Saıys qortyndysymen qazylar alqasy  birinshi orynǵa  Aqdala aýyl okrýginen kelgen Balǵynbaı Perdebekti laıyq dep tapty. Al ekinshi oryn  aýdandyq ardagerler uıymynyń atynan qatysqan Samarhan Baıdáýletov pen Jańabaı Erkeevterge buıyrdy.  Úshinshi oryndy Dermene aýylynyń qarııasy Murat Nurtanov pen Arys qalasynyń aqsaqaly Tynyshtyq Karbozovtar ıelendi. Jeńimpaz qarııalarǵa alǵys hattar men  baǵaly syılyqtar berildi.