Qazaqtyń sary maıdy shetelden tasýy - soraqylyq — Ermurat Bápı

ASTANA. KAZINFORM — Kelesi jyldan bastap Otandyq taýar óndirýshileri tizilimine engen kompanııalarǵa jeńildikter beriledi. Bul týraly Májilistiń jalpy otyrysynda Premer-mınıstrdiń orynbasary Qanat Bozymbaev aıtty. 

Otyrys barysynda depýtat Ermurat Bápı kúrdeli máselelerdiń biri — otandyq óndiris pen otandyq taýar óndirýshilerdi qoldaý máselesi áli kúnge deıin sheshilmeı kele jatqanyna alańdaýshylyq tanytty.

— Memlekettik nesıelik baǵdarlamalardyń kómegimen salynǵan óndiristik kásiporyndar 40-50 paıyzdan aspaıtyn qýatta jumys istep jatyr. Bıýdjettiń esebinen, memlekettik qarjyǵa saldyryp, ol kásiporyndardy naryqqa «laqtyryp» jiberemiz. Máselen, «Damý» jáne basqa da qorlardyń kómegimen salynǵan et kombınattary memlekettik tapsyrys bolmaǵandyqtan jartylaı múmkindikte ǵana jumys istep jatyr. Esesine naryqty Reseı men Belarýstyń azyq-túligi jaýlap alǵan. It ólgen, ıt emes-aý kıt ólgen Jańa Zelandııadan sary maı tasımyz. Tońazytqyshy joq qazaq qarynǵa salyp maı óndirgen. Jańa Zelandııadan maı tasý uıat qoı. Al bizdiń óndirisimiz toqtap tur. Baltyq jaǵalaýynan maı tasımyz. Maı óndirgen qazaqqa otandyq óndirisimizdi qoldamaı syrttan deldaldardyń kómegimen sary maı tasý - soraqylyq. «Samuryq-Kontrakshn» kompanııasy memlekettik nesıe saldyrǵan qurylys zaýyttary bankrot bolýdyń aldynda tur. Olarda aınalym joq. Úkimette tutas ustanym joq. Osy oraıda memlekettik baǵdarlama qajet dep oılaımyn. Memlekettiń ustanymy qandaı? Ne istep jatyr? — dep surady depýtat vıtse-premerden.

Saýalǵa jaýap bergen Qanat Bozymbaev otandyq óndirýshiler ishki naryqta básekelestikke saı bolsa, ımport toqtaıtyndyǵyn aıtady.

— Mysaly, sútke qanshama sýbsıdııa berilip jatyr. Qazir sút óńdeý zaýyttaryna Úkimet tarapynan qanshama kómek kórsetilip jatyr. Biraq, áli kúnge deıin ishki naryqty 100 paıyz qamtamasyz ettik dep aıta almaımyz. Bolashaqta kóp jumys isteý kerek. Árıne, tıisti josparlar bar. Mınıstrlik ótken jyly zańǵa qajetti túzetýler engizip, otandyq taýar óndirýshiler tizilimin elektrondy portalǵa qosty, — dedi ol.

Onyń aıtýynsha, aldaǵy ýaqytta taýardyń sáıkestigin bildiretin sertıfıkattar joıylady.

— Tizilimge kirgen kompanııalar kelesi jyldan bastap «Samuryq-Qazyna» tarapynan, tıisti memlekettik organdardyń tarapynan jeńildikter alady. Máselen, turǵyn úı-kommýnaldyq sharýashylyǵy men energetıkalyq sektordy jańǵyrtýǵa baǵyttalǵan úlken jobany qolǵa aldyq. Ol jobaǵa qajetti ónim shyǵaratyn otandyq taýar óndirýshiler bar bolsa, onda merdigerler sonyń taýarlaryn — qubyrlaryn, elektr jelilerin, transformatorlaryn 100 paıyz satyp alyp, jylý berý kompanııasynyń jabdyqtaryna engizedi. Biraq, bul másele tıisti halyqaralyq sharttarǵa saı kelmeı jatyr. Alaıda, soǵan qaramastan qolǵa aldyq. Mysaly, 6,6 trln teńge tek kommýnaldyq jelilerdi jańǵyrtýǵa qarastyrylǵan. Onyń ishinde shamamen 2 trln teńgege jýyq qarajat otandyq taýar óndirýshilerge túsedi. Jalpy, ár taýar boıynsha jeke ustanym bolýy tıis, — dedi Úkimet basshysynyń orynbasary.

Aıta keteıik, qazirgi ýaqytta Májilis memlekettik organdardyń el azamattarynyń ótinishin qaraý nátıjesin tyńdap jatyr.