Erlan Qarın ishki saıasat máselelerin talqylaý úshin Ulttyq quryltaı múshelerimen kezdesti
ASTANA. KAZINFORM – Memlekettik keńesshi Erlan Qarın Ulttyq quryltaıdyń birqatar múshesimen kezdesip, ishki saıasat máselelerin pysyqtady.
Basqosýǵa Aıdos Sarym, Murat Ábenov, Álııa Mustafına, Dıqan Qamzabekuly, Ermurat Bapı, Bórihan Nurmuhamedov, Erlan Saırov, Juldyz Súleımenova, Qazybek Dáýitalıev, Ýaıs Ersaıynuly, Laýra Qarabasova jáne Qaısar Tursynǵojaev qatysty.
Jıynda Memleket basshysy Qasym-Jomart Toqaevtyń bıyl naýryz aıynda Býrabaıda ótken Ulttyq quryltaıdyń IV otyrysynda kótergen bastamalary talqylandy.
Memleket basshysy 1 sáýir kúni Ulttyq quryltaıdyń IV otyrysynda kóterilgen bastamalardy júzege asyrý týraly Josparǵa qol qoıǵan bolatyn. 53 tarmaqtan turatyn qujatty Prezıdent Ákimshiligi Úkimetpen birlese otyryp ázirledi.
Buǵan qosa taıaýda 100-den astam bastamadan turatyn Ulttyq quryltaı músheleriniń usynystaryn qaraýdyń jospary bekitildi.
Usynystardy talqylaý barysynda ishki saıasat salasyna qatysty birtutas keshendi qujat daıarlaý qajettigine basa mán berildi.
Memlekettik keńesshi bul qujattyń sarapshylardyń, Ulttyq quryltaı músheleriniń, qoǵam belsendileri men memlekettik organdardyń qatysýymen birneshe aıdan beri ázirlenip jatqanyn atap ótti.
Erlan Qarın jańa qujattyń negizgi maqsaty – memleket pen qoǵam arasyndaǵy baılanysqa arqaý bolatyn qaǵıdattardy, ıdeologemalardy jáne qundylyqtardy aıqyndaý jáne jınaqtaý ekenine nazar aýdardy.
Quryltaı músheleri óz kezeginde bul qujattyń qabyldanýy ishki saıasat salasyndaǵy negizi aktorlar úshin basymdyqtardy aıqyndaýǵa múmkindik beretinin, memlekettik organdardyń osy baǵyttaǵy jumysyn bir júıege keltirýge yqpal etetinin atap ótti.
Qujat jobasy aldaǵy ýaqytta sarapshylar jáne azamattyq qoǵam ókilderimen birge taǵy da talqylanady.