Qarın: Kitap oqý mádenıetin qalyptastyrý — qoǵamnyń ortaq jaýapkershiligi

ASTANA. KAZINFORM — Qazaqstanda kitap oqý mádenıetin damytý máselesi qaıta nazarǵa ilikti. Bul rette memleket tıisti jaǵdaıdy jasap jatyr, endi basty mindet — qoǵamnyń ózinde. Bul týraly memlekettik keńesshi Erlan Qarın áleýmettik jelidegi paraqshasynda jazdy.

Erlan Qarın «Jas Alash» gazetinde kóterilgen kitap oqý deńgeıine qatysty materıalǵa pikir bildirdi. Ol kóterilgen másele shynynda da ózekti ekenin basa aıtty.

— Jýyrda «Jas Alash» gazetinde jarııalanǵan bir materıalǵa kózim tústi. Taqyryby — «Kitap oqymaıtyn qoǵam: Jalǵan statıstıkaǵa jasyrynǵan shyndyq». Talqyǵa baspager Shyńǵys Muqan, jazýshy-baspager Arman Álmenbet, kitaphana qyzmetkeri Aıdos Bektursyn ún qosypty. Kóterilgen másele shynynda da ózekti, — dep jazdy memlekettik keńesshi.

Qarınniń aıtýynsha, jastardy áleýmettik jelilerdiń yqpalynan shyǵaryp, kitap oqýǵa baýlý — qoǵamnyń ortaq jaýapkershiligi. «Ozyq oıly ult bolýdyń tóte joly — kitap oqý», — degen Memleket basshysynyń sózin mysal etken ol memleket eshkimdi májbúrleı almaıtynyn, biraq qajetti jaǵdaı jasalýy tıis ekenin atap ótti.

— Memleket eshkimdi kitap oqýǵa mindetteı almaıdy. Memlekettiń mindeti — osyǵan negiz bolatyn alǵysharttardy jasaý. ıAǵnı, oqyrmannyń qajettiligin óteıtin kitaptar basyp shyǵarý, sheteldiń úzdik týyndylaryn aýdarý, oqýǵa qolaıly jaǵdaı jasaý, oqý-bilimdi nasıhattaý, yntalandyrý, — dedi ol.

Sońǵy jyldary kitap oqýdy yntalandyrý baǵytynda birqatar jumys atqaryldy. Atap aıtqanda, Prezıdent bastamasymen 23 sáýir Ulttyq kitap kúni bolyp belgilendi. «Balalar kitaphanasy» jáne «Kitap-Amanat» jobalary iske qosyldy.

— Árbir qazaqstandyq oqýǵa tıis 100 kitaptyń tizimi aıqyndaldy. Almatydaǵy birneshe kitaphana 24/7 jumys rejımine kóshti. Sonymen qatar Prezıdent ıdeıasy boıynsha táýlik boıy jumys isteıtin zamanaýı kitaphananyń qurylysy bastalmaq. Qazirgi tańda qoǵamdyq kitaphanalarda 72 mıllıonnan astam qujat bar. Bıyldyń ózinde olardyń qory jańadan 1 029 568 baspa ónimimen tolyqty. Elektrondy qor 2,2 mıllıonnan asady. Onlaın oqý platformalary da belsendi jumys isteıdi, — dedi memlekettik keńesshi.

Qarın atap ótkendeı, memleket tarapynan jaǵdaı jasalǵanymen, endigi mańyzdy mindet — qoǵamda kitap oqýǵa degen qyzyǵýshylyqty arttyrý jáne úlgi bolatyn oqyrmandar ortasyn qalyptastyrý.

Budan buryn memlekettik keńesshi bilim berý mekemelerinde tárbıe jumysyn uıymdastyrý jóninde jıyn ótkizgenin jazǵan edik.