Qarın: Qazaq handyǵynyń tarıhy — ulttyq tarıhymyzdyń eń negizgi kezeńi

ASTANA. KAZINFORM — Otandyq tarıhtyń Qazaq handyǵyna arnalǵan tórtinshi tomy bekitildi. Bul týraly Aqordanyń baspasóz qyzmeti habarlady. 

Almatyda Memlekettik keńesshi Erlan Qarınniń tóraǵalyǵymen «Qazaqstan tarıhy: ejelgi dáýirden búginge deıin» atty jeti tomdyq akademııalyq basylymdy ázirleýge qatysty redaktsııa alqasynyń kezekti otyrysy ótti.

Basqosýda redaktsııalyq alqa músheleriniń eskertýleri men usynystary negizinde qaıta pysyqtalǵan Qazaq handyǵy kezeńine arnalǵan tórtinshi tomnyń qoljazbasy qaraldy. Talqylaý qorytyndysy boıynsha redaktsııa alqasy tórtinshi tomnyń qoljazbasyn bekitip, baspaǵa daıyndaý týraly sheshim qabyldady.

Memlekettik keńesshi atalǵan eńbektiń otandyq tarıh ǵylymyndaǵy mańyzy zor ekenine nazar aýdardy.

— Alǵash ret Qazaq handyǵynyń tarıhy kóptomdyq akademııalyq basylymda bólek tom ári birtutas irgeli eńbek retinde qarastyrylyp otyr. Qazaq handyǵynyń tarıhy — ulttyq tarıhymyzdyń eń negizgi kezeńi. Tórtinshi tomda qazaq memlekettiliginiń birneshe ǵasyrǵa jalǵasqan qalyptasý, damý, gúldený kezeńderi tolyq qamtylǵan. Tutastaı alǵanda Qazaqstannyń akademııalyq tarıhynyń tórtinshi tomy keshendi zertteý bolyp sanalady. Onda Qazaq handyǵy tarıhyn zertteýdegi zamanaýı ǵylymı tásilder men ozyq nátıjeler qamtylǵan. Bul otandyq tarıh ǵylymynyń damýyna qosylǵan mańyzdy úles bolyp esepteledi, — dedi Erlan Qarın.

Basylymnyń jańalyǵyna toqtalǵan Memlekettik keńesshi tomdy ázirleý barysynda Qazaqstan, Reseı, Qytaı, Ózbekstan jáne basqa da elderdiń muraǵat qorlarynan tabylǵan jazba derekter, qujattar men jádigerler paıdalanylyp, alǵash ret ǵylymı aınalymǵa engizilgenin aıtty. Tórtinshi tomǵa barlyǵy 187 sırek qujat engizildi, olardyń 180-i sheteldiń arhıv qorlarynan alynǵan.

Sondaı-aq redaktsııa alqasy «Qazaqstan tarıhy: ejelgi dáýirden búginge deıin» akademııalyq basylymynyń besinshi tomyn talqylady. Atalǵan tomnyń tujyrymdamasyn, qurylymy men mazmunyn avtorlar ujymynyń jetekshisi, tarıh ǵylymdarynyń doktory, Sh. Sh. Ýálıhanov atyndaǵy Tarıh jáne etnologııa ınstıtýtynyń dırektory, akademık Zııabek Qabyldınov tanystyrdy.

Sonymen qatar tarıh ǵylymdarynyń doktory, professor Murat Ábdirovtiń, tarıh ǵylymdarynyń doktory, akademık, Abaı atyndaǵy QazUPÝ-dyń zertteýshi professory Hangeldi Ábjanovtiń, tarıh ǵylymdarynyń kandıdaty, Ortalyq memlekettik arhıvtiń dırektory Sábıt Shildebaıdyń retsenzııalary tyńdaldy.

Redaktsııa alqasynyń Aıdos Sarym, Mámbet Qoıgeldıev, Erkin Ábil, Galına Ksenjık, Dıhan Qamzabekuly, Búrkitbaı Aıaǵan, Kúlǵazıra Baltabaeva, Kenjehan Matyjanov, Aıgúl Sádýaqasova, Andreı Chebotarev, Jaqsylyq Sábıtov, Merýert Ábýseıitova, Bereket Káribaev, Orazaq Smaǵulov, Berik Ábdiǵalıuly sekildi basqa da músheleri óz oı-pikirin ortaǵa saldy.

Jıyn sońynda redaktsııa alqasy akademııalyq basylymnyń besinshi tomyn jetildirý jumysyn odan ári jalǵastyryp, kelesi otyrysta qaıta qaraý týraly sheshim qabyldady. 

Aıta ketelik qazaq handyǵyna arnalǵan tórtinshi tomnyń qoljazbasy qaıta qaraldy.