Qarın etnosaralyq kelisimdi nyǵaıtý máselelerine arnalǵan respýblıkalyq jıyn ótkizdi

ASTANA. KAZINFORM — Memlekettik keńesshi Erlan Qarın ótkizgen basqosýǵa Prezıdent Ákimshiligi qurylymdyq bólimsheleriniń basshylary, ortalyq memlekettik organdardyń ókilderi, sondaı-aq Almaty oblysynyń ákimi qatysty, dep habarlaıdy Aqordanyń baspasóz qyzmeti.

— Jıynda etnosaralyq qatynastardy damytýdyń ózekti máseleleri, memlekettik apparat jumysyna jańa tetikterdi engizý, jańa qoǵamdyq etıkany qalyptastyrýǵa baǵyttalǵan ıdeologııalyq qyzmetti jetildirý sharalary qarastyryldy. Memlekettik keńesshi ıdeologııalyq jumystyń formalaryn únemi jańǵyrtý, jaýapkershilik pen syılastyq mádenıetin ilgeriletý qoǵamdyq kelisimdi nyǵaıtýdyń mańyzdy sharty ekenin atap ótti, — delingen Aqorda taratqan aqparatta.

Keńes qorytyndysy boıynsha memlekettik organdar men óńir ákimderine qoǵamdyq-saıası turaqtylyqty nyǵaıtýǵa baǵyttalǵan kúsh-jigerdi biriktirý jóninde naqty tapsyrmalar berildi.

Budan buryn Almatyda Qazaqstan-Reseı ekinshi medıaforýmy uıymdastyrylǵany belgili boldy. Oǵan eki eldiń jetekshi medıaqurylymdarynyń basshylary qatysty. Sonymen qatar Qazaqstan Respýblıkasynyń Memlekettik keńesshisi Erlan Qarın men Reseı Federatsııasy Prezıdenti Ákimshiligi basshysynyń orynbasary — Reseı Prezıdentiniń baspasóz hatshysy Dmıtrıı Peskov medıaforým qatysýshylaryna arnap quttyqtaý sóz sóıledi.