Qarın: El damýynyń jańa kezeńi ishki saıasat tásilderin qaıta qaraýdy talap etedi
ASTANA. KAZINFORM — Memlekettik keńesshi ishki saıasat máselelerine qatysty respýblıkalyq keńes ótkizdi, dep habarlaıdy Aqordanyń baspasóz qyzmeti.
Memlekettik keńesshi Erlan Qarınniń tóraǵalyǵymen ishki saıasat jáne ıdeologııa jumysyna qatysty respýblıkalyq keńes ótti. Basqosýǵa Prezıdent Ákimshiliginiń jaýapty qyzmetkerleri men qurylymdyq bólimsheleriniń basshylary, Úkimet músheleri, oblys jáne respýblıkalyq mańyzy bar qala ákimderiniń orynbasarlary, aımaqtardaǵy qoǵamdyq damý basqarmalarynyń jetekshileri qatysty.
Іs-sharada Memleket basshysynyń bastamalaryn tıimdi júzege asyrýǵa, etnosaralyq jáne konfessııaaralyq kelisimdi nyǵaıtýǵa, qoǵamdyq birlestiktermen jáne sarapshylar qaýymdastyǵymen ózara baılanysqa, aqparattyq jáne jastar saıasatyna qatysty máseleler talqylandy.
Erlan Qarın óz sózinde ishki saıasat salasyndaǵy jumysty uıymdastyrýǵa baılanysty ortaq ustanymdar men qaǵıdalardy belgilep, atalǵan baǵyttaǵy negizgi basymdyqtar jóninde aıtty. Sondaı-aq osy jyldyń basty taqyryptary men kún tártibine nazar aýdardy.
— Memleket basshysynyń bastamasymen asa mańyzdy saıası reformalar júzege asty. Qazirgi ýaqytta ekonomıkanyń áleýetin jan-jaqty nyǵaıtýǵa baǵyttalǵan aýqymdy jobalar qolǵa alynyp jatyr. El damýynyń jańa kezeńi ishki saıasattyń tásilderin de qaıta qaraýdy talap etedi. Sondyqtan ıdeologııa salasyndaǵy negizgi basymdyq qoǵamdaǵy turaqtylyq pen yntymaqty qamtamasyz etýmen qatar, jalpyulttyq qundylyqtardy ornyqtyrý jáne jańa qoǵamdyq etıkany qalyptastyrý jumystaryna berilip otyr. Osy sebepti memlekettiń búgingi saıasaty «Zań jáne tártip» qaǵıdasyn bekitýge, «Taza Qazaqstan» ıdeologııasyn ilgeriletýge baǵyttalǵan. Jalpy, ulttyń jańa sapasyn qalyptastyrýdy kózdeıtin tyń tásilderdi izdeý jumystary Ulttyq quryltaı jáne basqa da alańdar aıasynda únemi júrgizilip keledi, — dedi Memlekettik keńesshi.
Jıyn sońynda Erlan Qarın jaýapty memlekettik organdarǵa ishki saıasat salasyndaǵy jumysty proaktıvti rejımde júzege asyrý týraly tapsyrmalar berdi.
Osyǵan deıin memlekettik keńesshi Prezıdent bastamalaryn júzege asyrýǵa quryltaı músheleri zor úles qosyp kele jatqanyn atap ótti.