Kárim Másimov Jer reformasy jónindegi komıssııanyń jumysyn jarııalaýdy qamtamasyz etýdi tapsyrdy
ASTANA. QazAqparat - QR Premer-Mınıstri Kárim Másimov Jer reformasy jónindegi komıssııanyń jumysyn jarııalaýdy qamtamasyz etýdi tapsyrdy, dep habarlady Úkimettiń resmı saıtynda.
Búgin QR Premer-Mınıstri Kárim Másimovtiń tóraǵalyǵymen ótken Úkimettiń kezekti otyrysynda jer reformasy boıynsha Komıssııa qurý týraly Memleket basshysy Nursultan Nazarbaevtyń tapsyrmasyn iske asyrý barysy qaraldy.
Atalǵan másele boıynsha QR Premer-Mınıstriniń birinshi orynbasary - Komıssııa jetekshisi Baqytjan Saǵyntaev baıandady.
Komıssııa quramyna Parlament Májilisi men Senatynyń depýtattary, Úkimet músheleri, saıası partııalardyń, agrobıznestiń, salalyq qaýymdastyqtardyń ókilderi, ǵalymdar jáne azamattyq belsendiler kiredi.
Sonymen qatar, óńirlerdi de kóptep qamtý úshin Komıssııa jumysyna qoǵamdyq keńester de tartylatyn bolady.
Sondaı - aq, otyrysta Komıssııa jumysyn uıymdastyrý máselesi boıynsha QR aýyl sharýashylyǵy mınıstri Asqar Myrzahmetov pen QR aqparat jáne kommýnıkatsııalar mınıstri Dáýren Abaevtyń habarlamalary tyńdaldy.
Komıssııanyń saıası partııalarmen, qoǵamdyq uıymdarmen jáne óńirlermen ózara is-qımyly týraly «Nur Otan» partııasy Tóraǵasynyń birinshi orynbasary Muhtar Qul-Muhammed, Komıssııa jumysyndaǵy Ulttyq kásipkerler palatasynyń róli týraly «Atameken» UKP basqarma tóraǵasy Abylaı Myrzahmetov sóz sóıledi.
Talqylaýdy qorytyndylaı kele, Kárim Másimov Komıssııa jumysynyń elimiz jurtshylyǵy úshin mańyzdylyǵyn atap kórsetti. Úkimet basshysy osyǵan baılanysty aqparat jáne kommýnıkatsııalar mınıstrligine Komıssııa jumysynyń buqaralyq aqparat quraldarynda jarııalanýyn uıymdastyryp, óńirlerde tıisti aqparattyq jumystardy júrgizýdi tapsyrdy.
