Kárim Másimov: Ulttyq qaýipsizdik qyzmetkerleri týraly kitap shyǵady

NUR-SULTAN. QazAqparat – QR Ulttyq qaýipsizdik komıtetiniń tóraǵasy Kárim Másimovtiń jalpy redaktsııasymen «Otandyq arnaýly qyzmettiń hronıkalary. Adamdar, oqıǵalar, faktiler týraly hıkaıalar», «Memlekettik shekara» kitaptary basylymǵa daıyndaldy. Bul týraly QazAqparat Komıtettiń baspasóz qyzmetine silteme jasap habarlaıdy.

Kitaptar ulttyq qaýipsizdikti qamtamasyz etý jáne memleketimizdiń shepterin qorǵaý isine laıyqty úles qosqan jedel qyzmetkerler men shekarashylardyń qyzmeti týraly baıandaıdy.

Basylymdarǵa qazirgi ýaqytta qupııasyzdandyrýǵa bolatyn jaıttar ǵana engizildi. Onyń negizinde – naqty adamdar, oqıǵalar men faktiler, olar oǵan tikeleı qatysýshylardyń emotsııasyn jetkizetin qatań derekti stılde mazmundalǵan.

«Qurmetti oqyrmandar! Táýelsizdiktiń 30 jyldyǵy qarsańynda Ulttyq qaýipsizdik komıtetiniń basshylarymen birge elimizdiń barlyq aımaqtaryn jáne memlekettik shekarany araladyq. Jumys sapary aıasynda jedel qyzmetker men shekarashynyń eren eńbegi týraly halyqtyń az biletinin baıqadym. Sondyqtan, boryshyn minsiz oryndap júrgen jandar týraly aıtatyn ýaqyt keldi dep oıladym. Negizin Elbasy Nursultan Nazarbaev qalaǵan, nyǵaıtý baǵytyn Prezıdentimiz Qasym-Jomart Toqaev jalǵastyryp kele jatqan memleket egemendigine olardyń qosqan úlesin aıtqymyz keldi. Azamattardyń beıbit ómiri úshin bizdiń qyzmetkerler kúni-túni, ystyq-sýyqqa qaramaı qyzmet atqarady. Olar - bizdiń batyrlarymyz! Bul kitap solar týraly jazylǵan. Onyń negizinde naqty adamdar, qupııasy ashylǵan oqıǵalar men derekter bar. Kitap óz oqyrmanyn tabady dep senemin», deıdi Kárim Másimov.