Kárim Másimov trıatlonnan Qazaqstan chempıonatyn ashady
ASTANA. QazAqparat - 29 shildede Astana qalasynda trıatlonnan Azııa chempıonaty, al 30 shildede Qazaqstannyń ashyq chempıonaty ótedi. Qazirge deıin Azııa chempıonatyna 10-nan astam elden 40-qa jýyq trıatlonshy qatysýǵa ótinish bergen, dep habarlaıdy «QazAqparat» HAA tilshisi.
«Astanada halyqaralyq dárejede saıys ótkizýde bizde úlken tájirıbe bar. Ózderińiz biletindeı, qos saıys ta «EKSPO-2017» kórmesi aıasynda ótkiziledi. Birsypyra sharýalar atqaryldy. 30 shilde ótetin Qazaqstannyń ashyq chempıonatyna 200 adam qatysady. Trıatletterdiń sporty ońaı emes. Trıatlonshylardy «Temir adam» dep tekke aıtpaıtyny belgili», - deıdi QR Mádenıet jáne sport mınıstrligi Sport jáne dene shnyqtyrý isteri komıteti tóraǵasynyń orynbasary Serik Jarasbaev.
Uıymdastyrýshylardyń aıtýynsha, áıelder arasynda jáne erler arasyndaǵy Azııa chempıonatynyń júlde qoryna 15 myń AQSh dollardan tigilmek. Trıatlonshylar 750 metr qashyqtyqty ózende júzip ótip, 20 shaqyrymdy veosıpedpen baǵyndyrsa, sońǵy 5 shaqyrymdy júgirip ótedi. Al 30 shildede ótetin ashyq chempıonatta sport áýesqoılaryna kásipqoı atlettermen qatarly 1,9 shaqyrymdy júzip ótip, 90 shaqyrymdy velosıpedpen baǵyndyryp, jarysty 21 shaqyrymǵa jartylaı marafonmen aıaqtaýǵa múmkindik beriledi.
Aıta keteıik, Ashyq chempıonatqa qatysýǵa 200-den asa adam ótinish bergen. Olardyń arasynda QR Mádenıet jáne sport mınıstri Arystanbek Muhamedıuly men QR Aqparat jáne kommýnıkatsııalar mınıstri Dáýren Abaev qatyspaq. Trıatlonnan Qazaqstan ashyq chempıonatynyń saltanatty rásimin QR Trıatlon federatsııasynyń prezıdenti Kárim Másimov ashatyn bolady.
Sondaı-aq Ákimshilik polıtsııa basqarmasynyń habarlaýynsha, 29-30 shildede trıatlonnan týrnır ótkizý kezinde keıbir kóshelerde kólik qozǵalysy toqtatylady.
