Kárim Másimov Nursultan Nazarbaev jaıly kitap jazbaq

ASTANA. QazAqparat - QR Ulttyq qaýipsizdik komıtetiniń basshysy Kárim Másimov respýblıkalyq BAQ ókilderine bergen suhbatynda Qazaqstannyń Tuńǵysh Prezıdenti Nursultan Nazarbaev týraly kitap jazý nıeti bar ekenin aıtty, dep habarlaıdy QazAqparat tilshisi.

«Nursultan Ábishuly - uly adam. Ol jaıynda «Elbasy kómekshi kózimen» dep atalatyn kitap jazamyn», - dedi K.Másimov.

Onyń atap ótýinshe, kitap barynsha qyzyqty bolmaq.

«Jabyq» betteri bar kitap qyzyqty bolady», - dedi QR UQK tóraǵasy.

Aıta keteıik, Kárim Másimov 2016 jyldyń 8 qyrkúıeginde elimizdiń Ulttyq qaýipsizdik komıtetiniń tóraǵasy bolyp taǵaıyndalǵan edi.

Kárim Qajymqanuly 2003-2006 jyldary Nursultan Nazarbaevtyń kómekshisi, Premer-Mınıstrdiń orynbasary bolǵan edi. Sonymen qatar ol 2007-2012 jáne 2014-2016 jyldary eki ret el Úkimetin basqardy. QR Prezıdenti Ákimshiligine jetekshilik etti.

Ol birneshe márte ózin Prezıdenttiń kómekshisi dep ataǵan bolatyn.

«2007 jyly qańtarda, Nursultan Ábishuly, meni alǵash ret premer-mınıstr etip taǵaıyndadyńyz. Sol kezde qandaı qyzmette bolsam da, sizdiń adal kómekshińiz bolamyn dep ýáde bergen edim. Nursultan Ábishuly, búgin qaıta aıtqym kelip tur: men áli de sizdiń kómekshińizbin, áli de shákirtińizbin. Qazaqstandy damytý boıynsha úlken isterdi júzege asyrýǵa meniń de qatysýyma múmkindik bergenińizben maqtanamyn», - degen edi Kárim Másimov 2011 jyly.

2014 jyldyń 2 sáýirinde qaıta Premer-Mınıstr bolǵan Kárim Másimov Elbasynyń kómekshisi ekendigin taǵy da aıtqan edi.

«Nursultan Ábishuly, siz 2007 jyly meniń kandıdatýramdy usynǵan kezde muny alǵash ret aıtqan edim. Bul joly taǵy da qaıtalamaqpyn: Nursultan Ábishuly, men Sizdiń kómekshińiz boldym, kómekshińiz bolyp qala berem jáne barlyq ýaqytta da Sizdiń kómekshińiz bolamyn», - degen bolatyn K.Másimov.