Kárim Másimov Qytaıda jumys saparymen bolady
ASTANA. Sáýirdiń 26-sy. QazAqparat /Rýslan Ǵabbasov/ - Sáýirdiń 29 men mamyrdyń 1-i aralyǵynda QR Úkimet basshysy Kárim Másimov Qytaıda jumys saparymen bolady. Bul týraly búgin Astanada ótken brıfıngte Syrtqy ister mınıstrliginiń resmı ókili Asqar Ábdirahmanov málim etti,
dep habarlaıdy QazAqparat.
«Sáýirdiń 29 men mamyrdyń 1 aralyǵynda Qazaqstannyń Premer-Mınıstri K. Másimovtiń Shanhaı qalasynda ótetin «EKSPO-2010» dúnıejúzilik kórmeniń resmı ashylý rásimine qatysýymen ushtastyrylǵan Qytaı Halyq Respýblıkasyna jumys sapary bolady», dedi resmı ókil.
Onyń sózine qaraǵanda, Úkimet basshysy sapar barysynda Qytaıdyń saıası basshylyǵymen jáne Qazaqstanda jumys isteıtin iri Qytaı kompanııalary basshylarymen birqatar kezdesýler ótkizbek. «Kelissózder barysynda eki memleket arasyndaǵy eki jaqty yqpaldastyqtyń kókeıkesti máseleleri jáne bolashaq yntymaqtastyq sharalary talqylanady», dedi A. Ábdirahmanov.
Taratylǵan málimetterge qaraǵanda, «EKSPO-2010» dúnıejúzilik kórmesi Shanhaı qalasynda bıylǵy jylǵy mamyrdyń 1 men qazannyń 31-i aralyǵynda ótedi. Kórmeniń ashylý rásimi sáýirdiń 30-yna belgilenip otyr.
Qazaqstannyń ulttyq ekspozıtsııasynyń aıdary - «Astana - Eýrazııanyń júregi». Qazaqstandyq pavılon Astanany álemniń eń jas ári qarqyndy damyp kele jatqan elordalardyń biri retinde tanystyrady.
