Kárim Másimov isi «asa qupııa» rejıminde tergeldi – Bas prokýror
«Ózderińiz biletindeı, Ulttyq qaýipsizdik komıtetiniń burynǵy basshysy Kárim Másimovke qatysty memleketke opasyzdyq jasaý jáne basqa da asa aýyr qylmystar týraly is «asa qupııa» rejıminde tergeldi. Materıaldardy jarııalaýǵa shekteý qoıylǵan, óıtkeni olarda memlekettik qupııalar bar. Іste syrtqy saıası, qarsy barlaý jáne jedel-izdestirý qyzmetine qatysty málimetter bar. Olardy jarııalaý ulttyq qaýipsizdik múddelerine nuqsan keltirýi múmkin», - dedi Berik Asylov Májilistiń búgingi otyrysynda.
Qylmystyq is qazir sotta qaralyp jatyr. Bas prokýrordyń aıtýynsha, UQK-niń burynǵy tóraǵasy Másimov pen onyń burynǵy orynbasary Sadyqulov memleketke opasyzdyq jasaý; bılikti kúshtep basyp alýǵa baǵyttalǵan áreketter; laýazymdyq ókilettikterdi asyra paıdalaný boıynsha sotqa berildi.
«Taǵy bir burynǵy orynbasary Erǵojın bılikti kúshtep basyp alýǵa baǵyttalǵan áreketter jáne laýazymdyq ókilettikterdi asyra paıdalaný boıynsha aıyptalýda. Sondaı-aq burynǵy orynbasary Osıpovke jáne UQK bólimsheleriniń basqa basshylaryna ókilettikterdi asyra paıdalaný aıyby taǵylyp otyr. Basqa aqparatty asha almaımyn. Qastandyqtyń naqty egjeı-tegjeıin aıtýǵa quqyǵym joq», - dedi Berik Asylov.
Buǵan deıin Berik Asylov qańtar oqıǵasynda Dıkıı Arman men Qaırat Qudaıbergenniń qandaı qylmystar jasaǵanyn aıtqan edi. «Dıkıı Arman» beıbit turǵyndardy qonaqúılerdiń parkınginde kúshpen ustaǵan.
Sondaı-aq, shabýyldaýshylarǵa oq atý Prezıdent buıryǵynan buryn bastalǵan.
