Kárim Másimov elimizdegi ómir súrý sapasynyń ulttyq standartyn engizý jumystaryn jetildirýdi tapsyrdy
ASTANA. Jeltoqsannyń 22-si. QazAqparat /Arman Asqarov/ - Úkimettiń búgingi otyrysynda QR Eńbek jáne halyqty áleýmettik qorǵaý mınıstri Gúlshara Ábdihalyqova elimizdegi ómir súrý sapasynyń ulttyq standartyn engizý boıynsha josparlanyp otyrǵan jumystar boıynsha esep berdi,
dep habarlaıdy QazAqparat.
Mınıstrdiń sózine qaraǵanda, elimizdegi ómir súrý sapasynyń ulttyq standarty eńbek jáne halyqty áleýmettik qorǵaý saıasatynyń negizgi baǵyty bolmaq. Osy jumys aıasynda qazaqstandyqtardyń ómir súrý deńgeıin Eýropa talaptaryna deıin kóterip, halyqty jumyspen qamtýdyń jańa úlgisin ázirleý josparlanǵan. Osy júıeniń arqasynda 2020 jylǵa qaraı elimizdegi kásibı mamandardyń úles salmaǵyn 50 paıyzǵa deıin kóterip, jumyssyzdyqtyń deńgeıin 5 paıyzǵa deıin tómendetý kózdelgen. Al 2010 jylda engiziletin qaýip-qaterlerdi baǵalaý júıesin engizý arqyly óndiristegi apattyq jaǵdaılardy azaıtý josparlanyp otyr. Sondaı-aq kóshi-qon saıasatyn jańartý aıasynda elimizdiń soltústik aımaqtarynda qonystanatyn oralman qazaqtardyń sanyn 50 paıyzǵa deıin jetkizý josparda bar. Al Qazaqstanda eńbek etip jatqan sheteldik eńbekkerler úsh sanatqa bólinedi. «Áleýmettik kómek berý kólemi de ulǵaıatyn bolady. Osy saladaǵy tólemderdi halyqaralyq talaptarǵa deıin kóterý kózdelip otyr. Osynyń arqasynda 2015 jylǵa deıin zeınetaqy jáne járdemaqy kólemi 60 paıyzǵa deıin ósedi», - deıdi G.Ábdihalyqova.
QR Ekonomıka jáne bıýdjettik josparlaý mınıstri Baqyt Sultanov pen Indýstrııa jáne saýda mınıstri Áset Isekeshevtiń aıtýynsha, QR Eńbek jáne halyqty áleýmettik qorǵaý mınıstrliginiń osy baǵyttaǵy barlyq josparlary memlekettik baǵdarlamalar aıasynda qarastyrylǵan maqsat-mindettermen tolyqtaı baılanysyp otyr. Osyǵan oraı Úkimet basshysy Kárim Másimov ómir súrý sapasynyń ulttyq standartyn engizý boıynsha josparlanǵan barlyq jumystardy jetildirýdi tapsyrdy.
