Kárim Másimov Elbasyna eldegi áleýmettik-ekonomıkalyq jaǵdaı týraly baıandady

Bul týraly Úkimet basshysy óziniń Tvıtterdegi paraqshasynda habarlady.

«Memleket basshysyna eldegi áleýmettik-ekonomıkalyq jaǵdaı týraly baıandadym», - dep jazylǵan habarlamada.

Eske salaıyq, ótken Úkimet otyrysynda 2016 jyldyń 6 aıy ishindegi áleýmettik-ekonomıkalyq damý qorytyndylary qarastyrylǵan bolatyn.

Atap aıtqanda, ulttyq ekonomıka mınıstri Qýandyq Bıshimbaev Qazaqstan ekonomıkasy oń aımaqqa shyqqanyn málim etti. 2016 jyldyń qańtar-maýsym aılarynda 2015 jylǵy sáıkes kezeńmen salystyrǵanda ІJÓ ósimi 0,1% qurady. Ulttyq ekonomıka mınıstriniń aıtýynsha, bul ósimge «Nurly jol» jáne ındýstrıaldyq damý memlekettik baǵdarlamalarynyń júzege asyrylýy sep bolǵan. Sonymen qatar  ekonomıkany qoldaýǵa Úkimet pen QR Ulttyq bankiniń daǵdarysqa qarsy josparynyń júzege asyrylýy zor yqpalyn tıgizdi.

El aımaqtarynda da ósim baıqalady. Ekonomıkalyq kórsetkishteri boıynsha kósh basynda - Aqmola (6,5%), Ońtústik Qazaqstan (5,3%) Shyǵys Qazaqstan (4,3%) oblystary.