Kárim Másimov: Balabaqshalar máselesi Astana úlgisinde sheshilýi tıis
sp;ASTANA. Qarashanyń 27-si. QazAqparat /Tańatar Tabynuly/ - Elimizdiń aımaqtaryndaǵy balabaqshalar máselesi elordamyzdyń úlgisinde sheshilýi tıis. Budan bylaı árbir ákim apta boıyna balabaqshalardy aralap shyǵýy kerek. Qarashanyń 26-synda Astanadaǵy birneshe balabaqshany aralap kórgennen keıin Premer-Mınıstr Kárim Másimov bul úrdis el Úkimetiniń negizgi baǵyty bolatynyn málimdedi,
dep habarlaıdy QazAqparat.
Óıtkeni Elbasy Nursultan Nazarbaev qarashanyń 13-indegi tikeleı efırdegi elmen suhbatynda: «Balalardy balabaqshamen qamtamasyz etý máselesi bizdiń elimizdiń bilim berý júıesindegi basym baǵyttardyń biri bolyp tabylatynyn» erekshe atap aıtty.
Buǵan deıin Úkimet basshysy barlyq jaýapty vedomstvolarǵa balabaqshalarǵa qatysty ahýaldy taldaýǵa tapsyrma júktegen-di. Atap aıtsaq, bóbekjaılarǵa «qonystanǵan» memlekettik organdardy kóshirýge qatysty bılik sheshim qabyldaǵan bolatyn. Beısenbi kúni Premer-Mınıstr K. Másimov elordamyzdaǵy birqatar balabaqshalardy aralap, kóshpeli keńes ótkizdi. Osy keńeste búgingi kúni Qorǵanys, Ádilet, Іshki ister mınıstrlikteriniń jáne basqa da memlekettik organdardyń qaramaǵyna ótip ketken mektepke deıingi tárbıe beretin mekemelerdi memleketke qaıtarý jóninde tapsyrma berildi. «Bul jumysty isteý bizdiń qolymyzdan keledi. Sondyqtan, ony aıaǵyna deıin jetkizińizder», - dedi Kárim Qajymqanuly.
Memleket basshysynyń tapsyrmasyna oraı, el Úkimeti balabaqshalardy jóndeýden ótkizýdi 2010 jyly Jol kartasy memlekettik baǵdarlamasynyń basty basymdyqtarynyń biri dep jarııalady. Elordalyq balabaqshalardy kózimen kórgen Úkimet basshysy olardy kúrdeli jóndeýge qajetti qarjyny bólý tetikterin ázirleýge pármen berdi. «Endi osy maqsatqa qajetti qarjy kózderin bólýdiń tetikterin qarastyryp, naqty júıesin ázirleý kerek», - dedi ol kóshpeli keńeste sóılegen sózinde.
Onymen qosa, K. Másimov balabaqshalarda qosymsha oryndardyń ashylýy jónindegi Úkimet sheshimderiniń oryndalýyn BAQ arqyly halyqty habardar etip otyrýdy usyndy. Premerdiń pikirinshe, ótkir máseleni sheshýdegi Astananyń tájirıbesi respýblıkamyzdyń barlyq aımaqtaryna úlgi bola alady.
