Kárim Másimov: Astyq satý máselesine núkte qoıýymyz qajet
ASTANA. Qarashanyń 4-i. QazAqparat /Tańatar Tabynuly/ - Bir aptanyń ishinde Astyq odaǵymen, bıdaımen aınalysatyn oblystardyń ákimderimen birlesip, astyq satý máselesine qatysty usynystaryńyzdy ázirleńizder.
Aptanyń sońynda maǵan baıandaısyzdar, - degen edi dúısenbi kúngi selektorlyq otyrysta Úkimet basshysy Kárim Másimov Aýyl sharýashylyǵy, Kólik jáne kommýnıkatsııa mınıstrlikterine, «QazAgro» ulttyq holdıngine, «Qazaqstan temir joly» kompanııasyna jáne oblys ákimderine tapsyrma bere otyryp.
Atap aıtqanda, Aýyl sharýashylyǵy mınıstrligi men «QazAgro» holdıngi jınalǵan astyqty aldaǵy ýaqytta qaıda jáne qalaı satylatynyn aıqyndap berýi qajet. Premer-Mınıstr AÓK-di damytýǵa Ulttyq qordan bólingen qarajattyń paıdalaný merzimin 2010 jylǵa uzartý máselesin qarastyrýdy tapsyrdy. «Bul qarajatty kompanııalar boıynsha bólip kórsetińder», - dedi ol Aýyl sharýashylyǵy mınıstri men «QazAgro» holdınginiń basshysyna qaratyp sóılep. Onymen qosa, Úkimet basshysy tıisti vedomstvolar basshylaryna Astyq odaǵymen jáne elimizdegi iri astyq satatyn kompanııalarmen birlesip, bıdaıdy bankterdiń kepildigi arqyly ótkizý múmkindigin qarastyrýǵa ókim etti.
Sondaı-aq astyq máselesine qatysty bergen Premer-Mınıstrdiń tapsyrmalarynyń biri - bıdaı satýǵa dep naqtylanǵan bıýdjetten bólingen 5 mlrd. teńgeni tasymaldaýǵa ketetin shyǵyndardy jabýǵa jumsaý. Eń bastysy, otandyq dıqandarǵa tıimdi bolatyn tusy - el Úkimetiniń egin sebýge bólingen qarajatynyń qaıtarymyn kelesi jylǵa deıin uzartýy. Kólik jáne kommýnıkatsııa mınıstrligi men «Qazaqstan temir joly» UK-na 5 mlrd. teńgeni astyq tasymaldaýǵa jumsaıtyn kezdegi túpkilikti tizbesin jasaý mindeti júkteldi. «Eger de bul baǵyttaǵy isterimiz biz oılaǵandaı bolmasa, onda basqa joldaryn qarastyraıyq. Máselen, qarjylandyrý arqyly», - degen usynys aıtty K. Másimov.
