Kárim Másimov Aqtaý teńiz portynyń Soltústik termınalynyń jumysyn tekserdi
ASTANA. QazAqparat - QR Premer-Mınıstri Kárim Másimov Mańǵystaý oblysyndaǵy jumys sapary aıasynda Aqtaý portyn soltústik baǵytta keńeıtý jobasyn júzege asyrý barysymen tanysty, dep habarlaıdy pm.kz.
Jobanyń júzege asyrylý barysy týraly QR Premer-Mınıstrine «Qazaqstan temir joly» UK» prezıdenti Asqar Mámın baıandady.
Jobanyń júzege asyrylýy 3 kezeńdi qamtıdy: qorǵanysh gıdrotehnıkalyq qurylǵylar salý, sý tabanyn tereńdetý jumystaryn júrgizý jáne qurǵaq júk termınaldaryn salý. Munyń bári porttyń ótkizý qabiletin 16,5 mln tonnadan 19 mln tonnaǵa deıin arttyrýǵa múmkindik beredi.
Qazirgi kezde jobanyń sońǵy kezeńderi júzege asyrylýda, qyzmettik jáne óndiristik nysandaryn, ishki alańdardaǵy ınjenerlik jelilerge kirý joldaryn salý jumystary júrgizilýde.
Aqtaý jáne Baký porttarynyń arasynda turaqty parom qatynasy ornaǵan. Temirjol paromdary 18-20 saǵat ishinde 253 teńiz mılin eńsere otyryp, munaı ónimderin, halyq tutynatyn taýarlardy, astyq pen mıneraldyq tyńaıtqyshtardy tasymaldaıdy. Paromdarǵa 54 temirjol vagony men 35 aýyr júk tasymaldaıtyn avtomobıl sııady. Bir aı ishinde bul jerden 1000-ǵa deıin aýyr júk tasymaldaıtyn tehnıka ótedi.
2015 jyldyń qorytyndylary boıynsha jalpy júkterdiń aýystyrylyp tıelýi 5 mln 897 myń tonnany qurady. Birinshi jartyjyldyqtyń qorytyndylary boıynsha ol - 2 mln. 681 myń tonna.
Aqtaý teńiz porty Kaspıı teńiziniń shyǵys jaǵalaýynda, birneshe halyqaralyq kólik dálizderi qıysqan tusta ornalasqan. Bul shyǵystan batysqa, soltústikten ońtústikke jáne keri, Iran, Túrkııa, Reseı jáne Ázerbaıjan baǵytynda júk tasymaldaýdy qamtamasyz etýge múmkindik beredi.
Qazaqstanda turaqty ekonomıkalyq damý máseleleri basymdyqqa ıe. 19 shilde kúni birinshi jartyjyldyqtaǵy eldiń áleýmettik-ekonomıkalyq damý máseleleri boıynsha ótken Úkimet otyrysyn qorytyndylaı kele Premer-Mınıstr mınıstrler kabınetine Memleket basshysynyń tapsyrmalaryn erekshe baqylaýda ustaýdy tapsyrdy. Onyń ishinde ekonomıka salasy erekshe oryn alady.
«Ekonomıka oń aımaqqa shyqty. Endi osy jetistikti nyǵaıtý asa mańyzdy. Prezıdenttiń tapsyrmasy boıynsha qabyldanǵan barlyq baǵdarlamalar, barlyq sheshimder ár baǵdarlama ákimshisiniń, ár ákimniń erekshe baqylaýynda bolýy tıis. Ekonomıkada sezile bastaǵanymen, adamdar áli sezinbeýde. Ekonomıkalyq kórsetkishterdiń adamdarǵa jetkeni asa mańyzdy. Bul jumys oryndaryna, jalaqyǵa jáne ózge de máselelerge qatysty», - degen edi sol kezde Premer-Mınıstr.
