Kárim Kókirekbaev bokstan álem chempıonatynyń júldegerine páter berdi
TARAZ. QazAqparat - Jambyl oblysynyń ákimi Kárim Kókirekbaev álemdik sport dodalary men «Ýnıversıada-2017» jazǵy oıyndarynyń júldegerleri men bapkerlerdi qabyldady, dep habarlaıdy QazAqparat.
Oblys ákiminiń qabyldaýynda Gambýrgte ótken bokstan álem chempıonatynyń kúmis júldegeri Ábilhan Amanqul, Parıjde kúres sheberleri arasynda ótken chempıonattyń qola júldegeri Aqjúrek Tańatarov, Taıbeıde ótken «Ýnıversıada-2017» jazǵy oıyndarynyń qola júldesiniń ıegeri Bekádil Shaımerdenov boldy. Sonymen qatar óńir basshysy bokstan bapker Nurlan Aqúrpekov pen Ulttyq quramanyń bapkeri Nurdáýlet Momynovty da qabyldady.
«Sizderdiń sporttaǵy jetistikterińiz - bizdiń ulttymyzdyń maqtanyshy, elimizdiń zor qýanyshy»,-dedi ákim kezdesýde.
«Sizder bizdiń oblysymyzdy, tipti respýblıkamyzdy álemge tanyttyńyzdar. Shyn júrekten quttyqtaımyn, Sizderge degen alǵysym sheksiz. Óńirimizdegi sporttyń damýynda, ásirese onyń álemdik deńgeıge kóterilýinde Sizderdiń jankeshti eńbekterińizdiń izi jatyr».
Otandyq sportty damytý isine úles qosqany úshin óńir basshysy Amanqul Ábilhanǵa eki bólmeli páterdiń kiltin, ózge sportshylar men bapkerlerge aqshalaı syılyqtar tabys etti.
