Karım Benzema – UEFA ótken maýsymynyń úzdik oıynshysy
NUR-SULTAN. QazAqparat - Ispanııanyń «Real Madrıd» jáne Frantsııa quramasynyń shabýylshysy Karım Benzema UEFA nusqasy boıynsha ótken maýsymnyń úzdik oıynshysy atandy, dep habarlaıdy QazAqparat tilshisi.
Frantsýz shabýylshysy atalǵan marapatqa UEFA Chempıondar lıgasy toptyq kezeńi jerebesiniń tartylý rásiminen keıin ıe boldy.
Bıyl atalǵan ataqqa «Real Madrıd» jáne Belgııa quramasynyń qaqpashysy Tıbo Kýrtýa, Anglııanyń «Manchester Sıtı» jáne Belgııa quramasynyń jartylaı qorǵaýshysy Kevın De Breıne úmitker bolǵan edi.
Ótken maýsymda Karım Benzema madrıdtik klýb quramynda Chempıondar lıgasy men Ispanııa chempıonatyn jeńip aldy.
Sondaı-aq, atalǵan saltanatty sharada úzdik bapker ataǵyna «Real Madrıd» klýbyna jetekshilik etetin Karlo Anchelottı ıe boldy.
Foto: Getty Images
