Kárilik pen múgedektik adamnyń sportpen shuǵyldanýyna kedergi emes - almatylyq qarııa

Abdýǵanı Ahmedov 1961 jyly Tashkent qalasynda týǵan. Bala kezinen sportqa áýestigi bolypty.

«Bala kúnimde, 6, 7-synypta oqyǵan kezde aýyr atletıkamen aınalysqanmyn. 1980-jyldary azdap atletıkalyq gımnastıka, karate, taekvondomen shuǵyldanǵanym bar. Degenmen, eshqandaı jarysqa qatysyp kórmeppin. 9-synyptan soń Tashkenttegi №140 jıhaz ýchılışesine oqýǵa túsip, «jıhaz jasaýshy» mamandyǵyn alyp shyqtym. Keıin áskerge ketkenshe, Tashkent fabrıkasynda jıhaz jasaýshy bolyp eńbek ettim. 1979-1981 jyldary Qıyr Shyǵysta áskerı boryshymdy atqardym. Áskerden soń túrli zaýyt, fabrıka, qurylystarda dánekerleýshi, kranshy boldym», - dep eske alady Abdýǵanı aǵa.

Jas kúninde aıaqtaryn jaraqattap alady. Sodan oń aıaǵyna ınfektsııa túsip, tizesine deıin ampýtatsııa jasalady. Bir aıaǵynan aıyrylsa da, jigeri jasymaı, erteńgi kúnge senimmen qarap kele jatyr.

«1986 jyly aıaqtarymdy jaraqattap aldym. Keıinnen oń aıaǵyma ınfektsııa túsip, tizege deıin ampýtatsııalaýǵa týra keldi. 2017 jyly bul operatsııa sátti jasaldy. Al, 2018 jyly Almaty zaýytynda men úshin arnaıy protez daıyndalyp shyǵaryldy. Qazir ІІ toptaǵy múgedekpin. Negizi saý sol aıaǵymdy jaqsy jumys isteıdi dep aıta almaımyn. Degenmen, dárigerlerdiń kómegimen ony ampýtatsııadan aman alyp qaldyq», - deıdi ol.

Ol 2021 jyldan bastap sportpen, dálirek aıtqanda fıtnespen aınalysyp keledi. Bir protez aıaqpen sportpen shuǵyldaný asa qıyn emes ekenin aıtady.

«Qazir fıtnes zalyna baryp, densaýlyǵymdy kútip júrmin. Ótken jyly jeltoqsan aıynda qalalyq «Sport lıga» jarysyna qatysyp, eki medalǵa ıe boldym. Atap aıtqanda, 70 kg shtangany jatyp kóterý jáne 16 kelilik eki girdi turyp kóterýden birinshi oryn aldym. Sondaı-aq, ol jarysta qazir kóp tanyla qomaıǵan kúrestiń jańa túri «mas-restlıng» boıynsha ózimdi baıqap kórdim. Ótken jyly dál 31 jeltoqsan kúni 87,5 keli salmaqtaǵy shtangany jatyp kóterdim. Bul men úshin zor jetistik boldy. Men úshin bir protez aıaqpen sportpen shuǵyldaný asa qıyn emes», - deıdi keıipker.

«Jigitke jeti óner de az» degen ustanymmen ómir súretin Abdýǵanı aǵanyń sporttan bólek, ustalyq, zergerlik óneri bar. Ol óz qolymen temirden túrli sándik buıymdar jasaıdy.

«Bul ispen aınalysyp júrgenime birneshe jyldyń júzi boldy. Naqty aıtqanda, aıaǵyma operatsııa jasar aldynda bastaǵam. Eń áýeli, temirden gúl qoıýǵa arnalǵan tirekter, keıin sham ustaǵyshtar jasap, sosyn basqa da ınterer buıymdaryn jasaýǵa kóshtim. Osynyń barlyǵyn YouTube arqyly ózim úırendim. Ustalyq jumyspen úıimniń janynda qorshalmaǵan shaǵyn tsehymda, tek jazǵy ýaqytta aınalysamyn», - deıdi Abdýǵanı aǵa.

Qajetti materıaldy satyp alady. Arasynda tapsyrys qabyldaıdy.

«Keıde tapsyryspen jumys isteıtin kezderim bolady. Mysaly, tapsyryspen úıdiń kireberisine temir ilgishter jáne aǵash qabyǵy, júzim beınelerin temirden jasadym. Sonymen birge, eski kir jýǵysh mashınanyń motorynan shaǵyn tokarlyq stanok jasadym. Ol qazir jaqsy jaqsy jumys istep tur», - deıdi eńbek adamy.

Sonymen qatar, ol sýret salý, ilmekpen toqý, dámdi taǵamdardy pisirý ónerin meńgergen adam.

«Aıaǵyma operatsııa jasalǵan soń, bos ýaqytym kóp boldy. Osyny paıdalanyp, vıdeo sabaqtar arqyly qaryndashpen sýret salýdy úırendim. Osylaısha, óz qolymmen tabıǵatty, qysqy peızaj, teńiz tolqyny, aǵash, eski taqtanyń sýretterin saldym. Sonymen qatar, ilmekpen oıynshyqtardy toqımyn. Et qosylǵan tátti bálishter pisire alamyn», - deıdi qarııa.

Aqsaqaldyń ómirdegi qıyn sátterde, aıaǵyna operatsııa jasaıtyn kezde, operatsııadan keıin, basqa da syn saǵattarda janynan tabylyp, zor qoldaý kórsetken jan jary Roza apaıǵa alǵysy sheksiz.

«Ol meniń sondaı qıyn sátterimde únemi maǵan qoldaý kórsetip, qoltyǵymnan demep keledi. Operatsııadan soń maǵan kóp kómek kórsetti, kútip-baqty. Depressııaǵa túsýden saqtady. Tipti, joǵaryda aıtqan ónerdiń bárin áıelimniń arqasynda úırendim desem bolady. Sebebi, operatsııadan soń ol maǵan kompıýterdi, qajetti qural-saımandardy alyp berdi. Men solarmen jumys istep, aldanyp, kúızelis ataýlydan qutyldym», - dedi Abdýǵanı aǵa.

Sóz sońynda aqsaqal jastarǵa aıtar aqyl-keńesimen bólisti.

«Eger adam óz aldyna bıik maqsat, talap qoısa, onda oǵan ol qalaıda jetýi kerek jáne oǵan múgedektik eshqandaı kedergi bolmaýy kerek. Jalpy, adamnyń jasy men múgedektik sportpen aınalysýǵa kedergi emes. Al, búgingi jastarǵa aıtar aǵalyq aqylym – ózi unatqan paıdaly ispen shuǵyldansyn, altyn ýaqytyn bilim alý, eńbek etý, óner úırený jáne sportpen aınalysýǵa jumsasyn», - degen izgi tilegin bildirdi Abdýǵanı Ahmedov.