Káribaı Musyrman: Jemqorlyq eldiń jetistikterine kóleńke túsirip otyr

NUR-SULTAN. QazAqparat - El basyna qıyndyq týǵan qazirgi kezde jurt halyq amanatyn arqalaǵan depýtattar ne deıdi dep, astanaǵa, Parlamentke qaraıdy. Qazir olar «Parlamenttik kanıkýl» dep atalatyn demalysta bolǵanymen, keıbireýleri qoǵammen baılanysyn úzbeı, buqaralyq aqparat quraldary men áleýmettik jelilerde tóbe kórsetip júr. Solardyń biri – Májilistiń Áleýmettik-mádenı damý komıtetiniń hatshysy Káribaı Musyrmanǵa birneshe saýal qoıýdyń sáti tústi.

- Eldegi Tótenshe jaǵdaı, karantın sekildi qıyn kezeńde de qulqynynyń quly bolǵan jemqorlar áshkerelenip jatyr. Aıyptylardy qalaı jazalaǵan durys?

- Iá, «Jaý jaǵdan alǵanda bóri etekten aladynyń» keri bolyp tur. Prezıdent Qasym-Jomart Toqaevtyń tapsyrmasyna sáıkes tıisti tekserister, Áleýmettik medıtsınalyq saqtandyrý qory men «SQ Farmatsııa» kompanııasynyń burynǵy basshylaryna qatysty tergeýler júrgizilip jatqany málim. Buǵan qosa, jaqynda Sybaılas jemqorlyqqa qarsy is-qımyl agenttigi Tsıfrlyq damý, ınnovatsııalar jáne aeroǵarysh ónerkásibi mınıstrligi men Bilim jáne ǵylym mınıstrliginiń joǵary laýazymdy sheneýnikterine qatysty qylmystyq ister qozǵalǵandyǵyn da habarlady.

Árıne, aıyp taǵylǵandardyń kinási sot arqyly anyqtalyp, qoldanystaǵy zańnamaǵa sáıkes ádil úkim shyǵarylady dep senemin. Degenmen, kóptegen adam qurban bolyp jatqan indetke qarsy karantın men tótenshe jaǵdaı engizilgen qıyn ýaqytta da aram pıǵyldarynan aınymaǵan alaıaqtar men jemqorlardy barynsha qatań jazaǵa tartý jónindegi halyq talaby oryndy. «Qudaıyn umytqandardy» táýbege keltirý úshin zańdy qataıta túsý de qajet shyǵar degen oıdamyn.

- Halyq nege renishti? Nege Táýelsizdik jyldaryn jamandaý bel alyp barady?

- Halyqty ashýlandyratyn da, ashyndyratyn da – jemqorlyqtyń qazirgideı el basyndaǵy qıly kezeńde de tyıylmaı turǵandyǵy. Naýqas jandar qınalyp, ólim aýzynda jatqanda qoldan dári-dármek tapshylyǵyn jasap, olardyń baǵasyn qymbattatýǵa, alypsatarlyqpen aınalysýǵa jol berilgendigi sumdyq emes pe?! Osyndaı teris qubylystar Táýelsizdik jyldarynda qol jetkizgen jetistikterimizge kóleńkesin túsirgeni anyq. Óıtkeni, «Etigiń tar bolsa, dúnıeniń keńdiginen ne paıda?!» demekshi, ál ústinde jatqan jaqynyna aýadaı qajetti dárini taba almaı, sharq uryp, dal bolǵan jandardyń halyn túsinýge bolady ǵoı... Otqa syrttan maı quıýshylar da az emes. Olarǵa keregi de sol – Úkimettiń qatelikter jiberip, eldegi jaǵdaıdyń nasharlaı túsýi.

- Elge qandaı reforma kerek? Ne qatelikterdi túzeýimiz kerek? Alda qazaq elin ne kútip tur dep oılaısyz?

- Qandaı reforma kerektigin Memleket basshysy óziniń byltyrǵy Joldaýynda aıqyndap, «Halyq únine qulaq asatyn memleket» qurýǵa kúsh salatynyn málimdegen. Bul baǵytta jasalǵan alǵashqy qadamdardy jurt kórip, qoldap otyr. Prezıdent aldaǵy ýaqytta memlekettik basqarý qurylymyna ózgerister engiziletindigin de habarlady. Osynyń bári memlekettik organdardyń jumys tıimdiligin arttyrýǵa, sybaılas jemqorlyqqa qarsy kúresti kúsheıtýge oń yqpalyn tıgizedi dep oılaımyn.

Sóz oraıyna qaraı aıta keteıin, men senator Murat Baqtııarulynyń Bilim jáne ǵylym mınıstrligin ekige bólip, Aǵartý jáne kásibı-tehnıkalyq bilim mınıstrligi men Joǵary oqý oryndary jáne ǵylymdy damytý mınıstrligin qurý jónindegi usynysyn qoldaımyn. Bul atalǵan salalardy basqarýǵa sol salalardy jaqsy biletin joǵary bilikti mamandardy tartýǵa múmkindik beredi. Al «kadrlar bárin sheshetindigi» sózsiz.

Alla buıyrtsa, elimizde aldaǵy ýaqytta jaqsy ózgerister bolady, halqymyz «bir jaǵadan – bas, bir jeńnen qol shyǵarǵan» yntymaq-birlikpen pandemııany eńseredi, búgingi aýyr synaqtan taǵylym alyp, shyńdalyp shyǵady dep senemin.