Káribaı Musyrman: Latynǵa kóshý - elordany aýystyrýmen birdeı tarıhı mańyzdy sheshim
«Elbasynyń usynysymen kırıllıtsadan latyn grafıkasyna kóshkeli jatyrmyz. Jeke óz basym bul qadamdy qoldaımyn, óıtkeni ol elimizdiń keleshegine, ultymyzdyń jáne qazaq tiliniń bolashaǵy úshin qajetti shara dep bilemin. Jalpy, osy bastamany Elbasynyń elordany Almatydan Astanaǵa kóshirýmen birdeı tarıhı mańyzy bar sheshim dep sanaımyn. Latyn álipbıine aýysý jastarymyzdyń bolashaǵyna jol ashady, sondaı-aq qazaq tiliniń ádemiligin ári áýezdiligin saqtaýǵa múmkindik týǵyzady»,-dedi Káribaı Musyrman.
Onyń paıymynsha, memlekettik tildi latyn qarpine kóshirý álem elderinde turyp jatqan qandastarymyzdyń qazaq tilin úırenýine de jaqsy jaǵdaı jasaıdy.
«Jalpy osy taqyrypty únemi baqylap júrmin, ıaǵnı áleýmettik jelilerdegi pikirlerdi qarap otyramyn. Ásirese, birinshi jobaǵa qatysty syn men usynystar boldy. Aptanyń basynda Prezıdentke usynylǵan joba birinshi nusqaǵa qaraǵanda áldeqaıda pysyqtalǵan dep aıtýǵa bolady»,-dep atap ótti K. Musyrman.
Depýtattyń sózine qaraǵanda, latyn álipbıin engizýge Qazaqstan úlken daıyndyqpen kelip otyrǵandyqtan, eleýli qatelikterge jol berilmeıtin bolady.
«Ózderińiz bilesizder, qazaq jazýynyń latynsha nusqasyn búkil halyq bolyp talqylap jatyrmyz. Áleýmettik jelilerde, buqaralyq aqparat quraldarynda jan-jaqty pikir almasýlar qamtyldy. Sondyqtan tanystyrylǵan ekinshi joba qolaıly ári ońtaıly degen oıdamyn»,-dep túıindedi sózin ol.
Esterińizge sala keteıik, bıylǵy 9 qazanda Memleket basshysy Nursultan Nazarbaev memlekettik tildi latyn álipbıine kóshirý jobasy boıynsha jumys tobynyń múshelerin qabyldady. Jıynda Memleket basshysyna qoǵamdyq talqylaýlar barysynda kelip túsken usynystardy eskere otyryp ázirlengen qazaq tiliniń latyn qarpine negizdelgen biryńǵaı standartynyń jobasy usynyldy .
Foto facebook.com
