Kári qurlyqty A gepatıti alańdatýda
ASTANA. QazAqparat - Búgin Ortalyq kommýnıkatsııalar qyzmetindegi brıfıngte QR Densaýlyq saqtaý mınıstrligi Qoǵamdyq densaýlyqty saqtaý komıtetiniń tóraǵasy Jandarbek Bekshın Eýropada A gepatıtiniń taralýyna qatysty pikir bildirdi, dep habarlaıdy QazAqparat.
«A.Gepatıti Eýropada emes Amerıkada keńinen taralýda. Ásirese, Kalıfornııa, Koloroda shtattarynda beleń alyp otyr. Gepotıt boıynsha eń kúrdeli ahýal dál osy Shtattarda baıqalýda. Sondyqtan da bizdiń týrısterimiz ben iskerlik saparǵa shyǵatyn azamattarymyz eń birinshi kezekte muny este saqtaǵany jón», - dedi ol.
Onyń dereginshe, búginde Eýropada qyzylsha aýrýy asqyna bastaǵany baıqalady.
«Búgingi kúni Eýropada qyzylsha taralýda. Qazirde ol jaqta 100 myńnan astam oqıǵa tirkelip, onyń 30-dan astam qaza boldy. Muny ásirese ekpe jasalmaǵan balalar men jasóspirimder barar bolsa este saqtaǵan jón. Jas adam bul aýrýǵa shaldyqqannan keıin 6-7 jyldan soń, aqyl-esiniń kemistigi baıqalýy múmkin», - dedi Bekshın.
Sonymen qatar ol kári qurlyqta A-gepatımen aýrýdyń asqyna bastaǵandyǵyn da jasyrmady.
«Eýropada da derekter bar, A gepatıtimen aýrýdyń artyp kele jatqany baıqalady. Erterekte Germanııada bul aýrý óte sırek kezdesetin. Qazirgi ýaqytta Eýropada ókpe aýrýy men A.gepatıti máselesi kóterilýde. Munyń barlyǵy da bosqyndar sanynyń artýymen baılanysty ekendigi túsinikti», - dedi Komıtet basshysy.
