Qarǵys alma, alǵys al - ońtústikte «Qaıyrymdylyq kúni» ótti

ShYMKENT. QazAqparat - Ońtústik Qazaqstan oblysy aýmaǵynda «Jan jylýy» aktsııasy uıymdastyrylyp, jalǵyzbasty jáne áleýmettik turǵyda az qamtylǵan otbasylarǵa kómek kórsetildi, dep habarlaıdy QazAqparat tilshisi.

1 naýryz - Alǵys aıtý kúni merekesi qarsańynda ońtústikte bastalǵan onkúndiktiń ekinshi kúni osylaısha «Qaıyrymdylyq kúni» taqyrybynda jalǵasyn tapty.

 

Oblystyq Qazaqstan halqy Assambleıasynyń bastamasymen uıymdastyrylǵan aktsııaǵa etnomádenı birlestikter de belsene atsalysty. Olar Tólebı aýdanyndaǵy №2 jáne Saıram aýdanyndaǵy «Baýyrjan» otbasylyq negizdegi balalar úıiniń, sondaı-aq  Arys qalasyndaǵy T.Tájibaev atyndaǵy otbasy úlgisindegi balalar aýylyna baryp, ondaǵy tárbıelenýshilerge syılyqtar tartý etti. Jetkinshekterge kóterińki kóńil-kúı syılaý jáne Alǵys aıtý kúniniń mánin uǵyndyrý maqsatynda is-sharalar uıymdastyrdy. 

 

«Qıyn-qystaý kezeńde qazaq jerine kúshtep qonys aýdarylǵan túrli etnostardyń búgingi urpaqtary - bizderdiń qıynshylyqta pana bolǵan qazaq halqyna aıtar alǵysymyz sheksiz. Qazaq halqynyń baýyrmaldylyǵynyń arqasynda ósip-óndik. Ortaq otanymyzdyń órkendeýine úles qosýdy paryzym dep sanap, qaıyrymdylyq sharalaryna únemi qatysyp otyramyn. Mundaı ıgi sharalar adamdardyń arasyn jaqyndatyp, birlikti nyǵaıta túsedi», - deıdi oblystyq túrik etnomádenı birlestiginiń tóraǵasy Latıfsha Asanov.

 

Aıta keteıik, erteń «Shabyt kúni» aıasynda «Yntymaǵy jarasqan Qazaqstan!» taqyrybynda oblysymyzdyń barlyq aýdan, qalalarynda qolóner buıymdarynyń kórmeleri, jalpy orta mektepter men kolledjderde shyǵarmashylyq baıqaýlar uıymdastyrylady.

Eske sala keteıik, OQO-da bıyl Alǵys aıtý kúni on kún boıy atalyp ótetindigi týraly buǵan deıin habarlaǵan bolatynbyz.